Opgegaarde renosterhorings uit kluis gesteel

Altesame 51 renosterhorings is Maandagoggend uit ʼn kluis van die Noordwes-parkeraad se hoofkantoor in Mafikeng gesteel.

Die boosdoeners het veiligheidswagte ontduik en boonop die kluissleutels in die hande gekry om dit eenvoudig oop te sluit en die opgegaarde renosterhorings te buit.

Brig. Sabata Mokgwabone, polisiewoordvoerder, sê ʼn saak van diefstal op ʼn sakeperseel is aanhangig gemaak en word deur die Valke ondersoek.

Dave Bryant, die DA se woordvoerder oor bosbou, visserye en die omgewing, sê dit is moeilik om te glo dat die misdaad gepleeg kon word sonder die inligting en hulp van diegene in die kantoor.

Volgens inligting wat die DA ontvang het, het die diewe toegang tot die kantoor verkry waar die alarmstelsel glo afgeskakel was en veiligheidskameras in die gang verwyder is.

“Dit het die diewe in staat gestel om ongehinderd met hul misdaad voort te gaan. Dit het die polisie ook ʼn skokkende agt uur geneem om op die toneel op te daag, wat die misdadigers meer as genoeg tyd gegee het om te ontsnap,” sê Bryant.

Die DA vra nou dat personeel van die parkeraad as ʼn saak van dringendheid poligraaftoetse ondergaan en sê die diefstal is ʼn uitstekende voorbeeld van waarom dit geregverdig is.

Mokgwabane het by navraag oor die polisie se beweerde reaksietyd gesê die rede vir enige vertragings sal eers ná die ondersoek bekend wees.

Die DA sê alle pogings moet nou aangewend word om die horings op te spoor voordat dit die land verlaat en diegene verantwoordelik vir die diefstal te laat boet.

“Ons doen ʼn beroep op Barbara Creecy, minister van bosbou, visserye en die omgewing, om deursigtigheid oor die voorval te verseker. Dit moet insluit omvattende terugvoer oor die stappe wat gedoen word om die gesteelde horings terug te kry en die oortreders aan die pen te laat ry.”

Van die 51 renosterhorings wat gesteel is, was 14 van vrylopene diere, terwyl die res van onthoringoperasies afkomstig is.

“Hierdie voorval verteenwoordig nie net die verlies van hierdie manjifieke wesens nie, maar beklemtoon ook die dringende behoefte aan verbeterde veiligheidsmaatreëls om opgegaarde renosterhoring te beveilig.”

Bryant sê dit moet insluit streng veiligheidsprotokolle, gevorderde alarmstelsels, meer personeel en streng monitering.

“Renosters is ʼn ikoniese en bedreigde spesie wat ʼn belangrike rol speel in die handhawing van die balans van ons ekosisteme. Die verlies van 51 renosterhorings verteenwoordig ʼn verwoestende slag vir bewaringspogings en wildbewaring in die geheel.

“Ons moet vinnig en beslis optree om te verhoed dat sulke voorvalle in die toekoms herhaal word en moet die toekoms van hierdie wonderlike wesens verseker.”