Oud-onderburgemeester gevonnis oor seksuele aanranding

Argieffoto ter illustrasie. (Foto: Shutterstock)

’n Voormalige onderburgemeester van die Oudtshoorn- plaaslike munisipaliteit is tot vyf jaar direkte tronkstraf gevonnis nadat hy aan die seksuele aanranding van ’n werknemer in sy kantoor skuldig bevind is.

Eric Ntabazalila, woordvoerder van die Nasionale Vervolgingsgesag in die Wes-Kaap, sê dit is Mlandeli Abednico Nyuka se tweede skuldigbevinding en vonnisoplegging vir seksuele aanranding met “presies dieselfde modus operandi”.

Staatsaanklaer Mervan Saaiman het in die hof aangevoer dat Nyuka die betrokke werknemer in die jongste saak na sy kantoor geroep en die deur gesluit het.

Hy het haar eers probeer manipuleer en gesê hy sal toesien dat sy by die werk bevorder word.

“Hy het haar rok opgelig en sonder haar toestemming aan haar private dele gevat,” het Saaiman in die hof gesê.

“Die telefoon het gelukkig gelui en Nyuka het dit geantwoord. Die klaer kon in dié stadium by die kantoor uithardloop.”

Volgens Saaiman was die vrou uiters geskok oor wat gebeur het.

Nyuka was in dié stadium nog die onderburgemeester en sy het in sy kantoor gewerk.

Nyuka het regdeur sy verhoor ontken dat hy die klaer aangerand het, en aangevoer dat sy deel was van ’n ander faksie in die politieke party Saamstaan, waarvan albei lede was.

Lede van dié faksie het hulle volgens Nyuka tot die hooggeregshof gewend om hom uit die party te skop.

Hy het ook beweer dat die klaer “seksuele gunsies” aangebied het in ruil vir alles wat hy [Nyuka] vir haar gedoen het.

Hy kon egter nie verduidelik waarom dié beweerde weergawe van die gebeure eers gedurende die verdediging se saak aan die klaer en hof voorgehou is nie. Sy het die bewerings egter ontken en getuig dat sy Nyuka nog altyd ondersteun het – ook in aangeleenthede wat met die party verband hou.

Saaiman het ook ’n getuie geroep wat die klaer van die begin af bygestaan het om die saak by die polisie aan te meld. Die hof het bevind dat dié getuie inderdaad ’n geloofwaardige getuie is.

Die landdros, Sylvia Mandla, het egter bevind dat Nyuka nie ’n geloofwaardige getuie is nie, wat sy eie bewyse opgemaak het.

Sy het bevind dat hy sy senioriteit uitgebuit het om seksuele gunse te bekom en hom op aanklagte van seksuele aanranding skuldig bevind.

Saaiman het ook die dossier van ’n ander soortgelyke saak teen Nyuka bekom, wat volgens die staat bewys dat hy ’n seksuele oortreder is wat sy mag misbruik het.

Hy is gevolglik tot vyf jaar tronkstraf gevonnis.

Adv. Nicolette Bell, direkteur van opebare vervolging in die Wes-Kaap, het die vonnis verwelkom en gesê sy verafsku die dade van die voormalige onderburgemeester wat sy posisie misbruik het om ’n vrouewerknemer in sy kantoor seksueel aan te rand.