Panayiotou-saak: Minnares wis niks van moord of oproepe

Chanelle Coutts getuig tydens Christopher Panayiotou se hofsaak (16 Oktober 2017) Foto: Raahil Sain, ANA

Chanelle Coutts, die moordbeskuldigde Christopher Panayiotou se minnares, het Maandag as ʼn getuie vir die verdediging in die Port Elizabeth-hooggeregshof verskyn.

Lede van die media, die Inggs-familie, Panayiotou-familielede en vroue wat Coutts ondersteun het in die openbare galery gesit.

Coutts (29) wat as ʼn bestuurder by Panayiotou se OK Grocer gewerk het, het getuig dat die polisie haar in die dae ná Jayde se dood in April 2015, onder druk geplaas het om inligting aan hulle te verskaf.

Coutts het gesê die polisie het haar by die OK Grocer opgelaai en na die Valke se kantoor in Newton Park geneem. Sy het gesê sy was “verward, bekommerd en geïntimideer” tydens die drie uur lange vergadering.

Sy het in ʼn stadium besluit om prokureur Danie Gouws aan te stel, omdat sy gevoel het die polisie teister haar. “[Ondersoekbeampte] Kanna het na my huis toe gekom en het baie druk op my geplaas en dieselfde vrae oor en oor vir my gevra. Hulle het aangevoer ek probeer Christopher beskerm.”

Coutts ontken dat Panayiotou ʼn deposito van R17 000 vir haar nuwe Polo-motor betaal het. Sy voer aan Panayiotou het dit deur middel van ʼn bonus bygedra. Sy beweer die geld is direk aan Tavcor oorbetaal. Staatsadvokaat Marius Stander het egter bevraagteken waarom die bedrag, as dit ʼn bonus was vir haar werk by die OK Grocer, nie in die maatskappy se finansiële state reflekteer nie.

Coutts het gesê sy het omvattende kennis van dit wat by die OK Grocer gebeur, veral wat voorraadbeheer, geldsake, begroting en dag-tot-dagbedrywighede betref. Sy ontken dat die maatskappy ooit finansiële probleme gehad het en beweer die polisie het inligting in haar verklaring gefabriseer.

Christopher Panayiotou in die hof (16 Oktober 2017) Foto: Raahil Sain, ANA

Sy het gesê sy het “geen idee” hoe die staat die inligting oor die motief vir Jayde se beweerde moord gekry het nie. Adv. Terry Price het haar gevra: “Die staat het tydens die borgtogaansoek beweer die motief vir Jayde se moord is dat Christopher Jayde wou vermoor omdat sy hom te veel geld gekos het.”

Sy ontken dat sy enige kennis gehad het van geld vir ʼn beweerde sluipmoordenaar wat in ʼn sak by die OK Grocer se stoorkamer gehou is. “Ons het baie streng beheer by OK [Grocer]. Die stoorkamer was nie gesluit nie en enigiemand het toegang gehad. Ek het nie enige geld in ʼn sak gesien nie,” het Coutts getuig.

Sy beweer sy het ook nie enige kennis gehad van die omstandighede wat tot die onderwyseres se moord gelei het nie. “Ek het dit vir die polisie gesê, maar hulle het die heeltyd druk op my geplaas.”

Coutts kon egter nie verduidelik waarom haar selfoonnommer minstens 17 keer gebruik is om met ʼn vermeende sluipmoordenaar, Trompie, te kommunikeer nie. Sy het onder kruisverhoor gesê sy het geen kennis van die oproepe nie.

Die selferkende middelman, en uitsmyter by Panayiotou se Infinity-nagklub, Luthando Siyoni, het na bewering in 2014 ʼn ontmoeting gereël tussen Panayiotou en Trompie nadat die sakeman Siyoni gevra het om iemand te huur om sy vrou te vermoor.

Volgens Siyoni se verklaring het niks na dié ontmoeting gebeur nie en ander beweerde sluipmoordenaars is genader. Volgens Siyoni was Trompie een van die eerste sluipmoordenaars wat genader is.

Selfoondata, wat vroeër aan die hof voorgehou is, het gewys dat Coutts se selfoon minstens 17 keer oor vyf dae tussen September en Oktober 2014 gebruik is om met Trompie te kommunikeer.

Coutts het gesê sy weet niks van hierdie oproepe nie en sal ook nie die nommer herken as sy dit moet sien nie. “Ek ken nie eers iemand met die naam Trompie nie,” het sy gesê.

Selfoondata het ook gewys dat Panayiotou en Coutts se oproepe aan mekaar gereeld die laaste oproepe vir die dag was en dat Coutts se selfoon in die aande naby Jayde se huis was, terwyl die onderwyseres uitstedig was. Sy het aan die hof erken dat sy by Jayde se huis oornag het wanneer die onderwyseres nie tuis was nie.

Sy was “kwaad en het seergemaak gevoel” toe Christopher vir haar gesê het hy en Jayde gaan trou. Die buite-egtelike verhouding het egter ná die troue voortgeduur.

Die staat voer aan Panayiotou het Luthando Siyoni, ʼn uitsmyter by sy Infinity-nagklub, geld betaal om die sluipmoordenaar Sizwe Vumazonke te huur om Jayde te ontvoer en te vermoor. Die staat voer aan dat Sinethemba Nenembe Vumazonke ondersteun het om Jayde te ontvoer en te vermoor. Vumazonke het na bewering Jayde na Kwanobhule geneem en haar twee keer in die rug en een keer in die kop geskiet. Vumazonke is intussen oorlede. Panayiotou, Nenembe en Zolani Sibeko staan tereg op aanklag van ontvoering, roof en die moord op Jayde op 21 April 2015.

Die saak duur voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

10 Kommentare

jongste oudste gewildste
Rasper

Wat my verstand te bowe gaan hoe kan jy wat vrou is met n getroude man uitgaan. Dis baie swak van jou as vrou om met n ander vrou se man te lol. Ek weet ” it takes two to tango” maar jy kon nee gese het. Jy sal nie daarvan hou as jy getroud was dat n ander vrou dit aan jou doen nie.

Domvraag

Ek dink nie sy het hoë morele waardes nie..spring in n ander vrou se bed wanneer die uitstedig is en daarom glo ek haar nie dat sy nie weet of bewus is daarvan dat haar selfoon 17 keer gebruik is .Regtig 17 keer en jy weet niks, sien niks??

hannes marais

ek weet van n onderwyseres wat n huwelik opgebreek het en n affair met n getroude man gehad het…

kry al die feite

Dit is altyd so dat die ander vrou die skuld kry, ek keur dit wat gebeur het glad nie goed nie, dis onnodig en wreed. Maar dis tyd dat die man in so geval ook die skuld dra vir ‘n buite egtelike verhouding en NEE in sy woordeskat kan opneem, nie net die ander vrou nie, maar nee die maklike uitweg is altyd dat die ander vrou die oorsaak van als is. Niemand weet wat regtig in ‘n ander se lewe – veral agter toe deure aangaan nie , en gooi maar die klippe as jou lewe so skoon is

hannes marais

vrouens weet waarvoor hulle,hulle inlaat as hulle met n getroude man n verhouding aanknoop,so ook die mans as hulle n affair met n vrou het terwyl hulle getroud is..albei partye se skuld en omdat albei partye so selfsugtig is vir hul eie geluk gee hul nie om hoe die wetlike vrou of man moet voel nie…sal opbreek en vernietig vir hul eie geluk.ek het net n stelling gemaak dat ek weet van so n geval waar n onderwyseres n huwelik vernietig het…ek kies geen kant nie