Polisie kap terug oor R1,6 miljard se PBT

(Argieffoto: Pixabay)

Die Suid-Afrikaanse Polisiediens (SAPD) het teruggekap na berigte dat hy onreëlmatig R1,6 miljard aan persoonlike beskermende toerusting (PBT) bestee het.

Volgens brig. Vish Naidoo, nasionale polisiewoordvoerder, het die SAPD se verkrygingsafdeling in Maart verlede jaar goedkeuring gekry vir ’n afwyking vir die noodverkryging van PBT. “Dit beteken dat aan behoorlike verkrygingsprosesse en -prosedures voldoen is.

“Aan die begin van die pandemie was die broodnodige PBT skaars en is die beskikbare toerusting teen ’n baie hoër prys as normaalweg verkoop, en moes die afwyking dus toegestaan word.”

Die Daily Maverick het berig die R1,6 miljard is in die bestek van ses maande spandeer en sluit onder meer R11 miljoen in wat aan ’n Dr Love Foundation, glo ’n maatskappy sonder winsbejag, betaal is nadat ’n “mondelikse bestelling” geplaas is. Die maatskappy kon volgens die berig egter nie op die nasionale tesourie se databasis vir kleinsakeontwikkeling opgespoor word nie.

Die SAPD hou egter vol dat die Daily Maverick se artikel is misleidend en onwaar. “Die interne ouditverslag, waarop die artikel gegrond is, het aanvanklik om en by Oktober verlede jaar aan die lig gekom. Die genoemde dokument is ’n ongetekende en ongetoetste verslag met ’n klassifikasiestempel van vertroulik.”

Volgens Naidoo is die polisiebestuur nie bewus van enige bewerings of ondersoeke wat uit die dokument gespruit het nie.

Die Daily Maverick berig egter dat aanbeveel is dat ’n forensiese ondersoek gedoen moes word en dat die verslag op ’n ernstige gebrek aan bestuur gedui het.

Naidoo het gesê die SAPD se PBT-verkrygingsproses kom net soos die van ander staatsdepartemente onder die loep van die sogenaamde “Fusion”-sentrum wat as die koördinerende liggaam opgetree het vir wetstoepassingsagentskappe wat Covid-19-korrupsie moes ondersoek.

“In die verband is gedetailleerde voorleggings oor die verkryging van PBT aan die Fusion-sentrum gedoen. Die SAPD-bestuur het ook verder gegaan en maatskappye wat PBT teen opgeblase pryse verkoop het aan die Mededingingskommissie gerapporteer.”

Die DA het intussen versoek dat die Valke dringend verslag aan die parlement moet doen oor die beweerde onreëlmatige besteding van R1,6 miljard.

Andrew Whitfield, DA-LP en die party se woordvoerder oor polisie, het gesê oorsig is nou belangriker as ooit tevore met die ANC-regering se “gewetenlose plundering” van Covid-19-fondse wat aan die lig kom.

“Dit is skokkend dat die instelling wat die land moet beskerm en korrupte plunderaars moet aankeer, deel uitmaak van ’n massiewe PBT-korrupsieskandaal. Die SAPD is veronderstel om bo verdenking te wees en die voorbeeld te stel vir alle Suid-Afrikaners, maar het toegelaat dat sy geloofwaardigheid aan flarde geskeur word.”