‘Polisiebrutaliteit-skokvideo’: Beamptes geïdentifiseer

'n Skermskoot uit die video. Die video volg onderaand die berig.

‘n Skermskoot uit die video. Die video volg in die skakel onderaand die berig.

Twee beamptes van die Douglasdale-polisiekantoor in Johannesburg het kennisgewings ontvang oor moontlike interne stappe nadat ʼn video van vermeende polisiebrutaliteit vandeesweek aan die lig gekom het.

Ao. Balan Muthan, polisiewoordvoerder, het Donderdag aan Maroela Media gesê die beamptes het nog nie amptelike skorsingskennisgewings ontvang soos in sommige media berig word nie. “Die provinsiale kommissaris vergader tans met die polisie se regsafdeling. Indien hulle besluit om die lede te skors, sal die kennisgewings uitgereik word. Dit behoort voor die einde van die week te wees,” het Muthan gesê. Hy het bevestig dat die onafhanklike polisie-ondersoekdirektoraat (Opod) ook die voorval ondersoek.

“Opod sal ná die ondersoek beslis watter stappe teen die lede gedoen gaan word,” het Muthan gesê.

Grace Langa, woordvoerder van Opod, het Donderdag aan Maroela Media bevestig dat hulle die dossier Woensdag reeds ontvang het en hul ondersoek van stapel gestuur het.

“Daar kan nie dadelik gesê word hoe lank die ondersoek gaan duur nie,” het Langa gesê. “Die ondersoektydperk hang van verskeie faktore af. Opod neem die nodige verklarings van die slagoffers en beamptes af en het ook mediese verslae van die slagoffer aangevra.”

Nico Venter, die prokureur van die twee mans wat glo die slagoffers van die polisiebeamptes was, het aan Maroela Media gesê ʼn ondersoekbeampte het reeds met hulle in verbinding getree en hulle gee hul samewerking aan die polisie en Opod.

“Die twee mans is steeds erg getraumatiseerd en ons het aanbeveel dat hulle vir berading gaan,” het Venter gesê.

Venter het gesê hulle sal die nodige instruksies neem ten opsigte van verdere regstappe en moet ook kennis aan die staat gee indien hulle voortgaan daarmee.

Maroela Media het Dinsdag berig ʼn jong man moes magteloos toekyk hoe sy vriend en vennoot glo deur twee polisiebeamptes aangerand, gewurg en onsedelik deursoek is, kort nadat die beamptes hom met die dood gedreig het as hy sou inmeng.

Die video deel die weergawe van die mans, wat uit vrees vir viktimisering die skuilname Anton en Shane gebruik. Shane is heeltyd aan die woord omdat Anton steeds te getraumatiseerd is om oor die voorval te praat.

Maroela Media het verneem die vennote, albei 25 jaar oud en van Kempton Park, bedryf hul eie sakeonderneming en het pas werk by die Pineslopes-winkelsentrum afgehandel toe hulle op 18 Augustus in die vroeë oggendure deur twee polisiebeamptes by hul motor voorgekeer is. Anton is daarna glo aangerand en gewurg totdat hy sy bewussyn verloor het, waarna ʼn beampte glo ’n rektale ondersoek op hom uitgevoer en ook sy geslagsdele ondersoek het.

Daar word vermoed dat die beamptes na dwelms gesoek het, maar niks gekry het nie.

ʼn Beampte van die Gautengse blitspatrollie se dwelmeenheid het aan Maroela Media gesê dit is glad nie standaardprosedure om ’n rektale ondersoek in die openbaar uit te voer nie, en sodanige optrede kan moontlik aan verkragting grens.

Klik hier om die video te sien. WAARSKUWING: Die video bevat kru taal, is gewelddadig van aard en kan sensitiewe kykers ontstel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
Riana

Ongelukkig gaan hiervan niks kom nie…….ek veralgemeen nie…..90% van die polisie is ons vyande en hulle maak soos hulle wil, want niks gebeur hulle kom weg met alles en nog meer, en as mense gereg in eie hande neem, word hulle lewenslange tronkstraf opgele! Sterkte vir die mense, liewe genade, kan nie eens myself indink waardeur julle moet gaan nie!! Gemors!!!

Piet Pompies

In Amerika is daar openbare geweld as wit op swart Polisie geweld plaasvind!
Hoekom is daar nie openbare geweld in SA as gevolg van swart op wit Polisie geweld ?

anet

Sterte aan die twee jongmanne, ek wens julle ‘n spoedige herstel toe. Dit is verskriklik om van hierdie aanval te hoor. Ek kan nie verstaan dat ‘n beampte kan se moontlike verkragting nie. Dit was ‘n absoluute verkragting en ook dat die jongman se waardigheid en reg tot privaatheid van sy persoon deur sulke bullebakke besoedel is, en wat hulle self POLISIEBEAMPTES noem.

Ek hoop die skuldige partye word gou aangetree, en uit die samelewing verwyder word.

Daleen

Verwyder hierdie beamptes uit die samelewing. Hulle het duidelik geen respek vir ander nie. As dit die manier is om onskuldige mense te behandel sidder ek om te dink wat met mense sal gebeur as die twee beamptes besluit hulle is skuldig aan enige oortreding. Hoe behandel hierdie mense hulle eie “stout” kinders? Verwyder die beamptes uit die samelewing en doen ‘n deeglike ondersoek na moontlike geweld in die gesin

John Jr

“kan moonlik aan verkragting grens” Wat anders is dit as verkragting? Ek glo vir daai jong man het dit niks soos “grens aan” gevoel nie!