Ramaphosa stuur gesante om Zimbabwe te help

Pres. Cyril Ramaphosa. (Foto: Presidensie/Twitter)

Pres. Cyril Ramaphosa het Donderdag dr. Sydney Mufamadi, voormalige kabinetsminister, en Baleka Mbete, voormalige speaker van die parlement, as sy spesiale verteenwoordigers na Zimbabwe aangestel.

Betogings teen die Zimbabwiese regering het die afgelope week opgevlam waar die polisie en weermag betogers hardhandig gehanteer het. Dit het ʼn inploffing van die menseregteskendingskrisis tot gevolg gehad.

Die #ZimbabweanLivesMatter-veldtog het vandeesweek momentum begin kry op sosialemedianetwerke, waaronder Twitter.

Internasionale persoonlikhede en politieke aktiviste in Suid-Afrika het by die #ZimbabweanLivesMatter-veldtog op Twitter aangesluit en die regering in Harare word gemaan om ʼn einde te bring aan onderdrukking onder die Mnangagwa-geleide regering.

Daar is ook druk op die Suid-Afrikaanse regering geplaas om in te gryp in wat aktiviste ʼn “krimpende demokratiese ruimte” noem. Dit het tot Ramaphosa se besluit gelei om Mufamadi en Mbete as gesante te stuur.

(Foto: Chihera wepaWedza via Twitter)

Die presidensie het in ʼn verklaring gesê Mufamadi en Mbete sal na verwagting met die Zimbabwiese regering en die betrokke belanghebbendes praat om moontlike maniere waarop Suid-Afrika Zimbabwe kan help, te identifiseer.

Hulle sal so gou moontlik na Zimbabwe vertrek.

Maroela Media het vroeër berig die Zimbabwiese regering het Donderdag “valse bewerings” van menseregteskendings en ʼn krisis in die land verwerp. Nick Mangwana, permanente sekretaris in die inligtingsministerie, het gesê die bewerings word versprei deur bekende politieke aktiviste, enkelinge wat oor waninligting beskik en internasionale akteurs.

Foto: @dougcoltart/Twitter

“Daar is geen krisis of inploffing in Zimbabwe nie. Burgers is nie ontvoer nie en daar is ook nie ʼn oorlog op inwoners nie. Net soos in enige ander land in die wêreld pas Zimbabwe Covid-19-afsonderingsmaatreëls toe wat ten doel het om die lewe van alle burgers te beskerm. Waar nodig, is wette regverdig toegepas,” het Mangwana gesê.

Mangwana het gesê die sogenaamde krisis is ʼn doelbewuste poging om die beeld van die land skade te berokken deurdat gedokterde foto’s, ou video’s en aangedikte bewerings op sosiale media gebruik word. “Dit het ten doel om ʼn prentjie te skets van ʼn Zimbabwe wat aan die brand is. Niks kan verder van die waarheid wees nie.”

Mangwana het gesê Zimbabwe is “vreedsaam en alle burgers is vry” om binne Covid-19-riglyne aan te gaan met hul lewe.

Die burgerregtegroep #NotInMyName in Suid-Afrika het vandeesweek aangekondig dat hy Vrydag ʼn betoging by die Zimbabwiese ambassade in Pretoria sal hou oor die “verdwyning van demokratiese ruimte” in Zimbabwe.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Fufu

Vee eerder voor jou eie deur. SA het groter probleme maar jy hou jouself besig met dinge wat jou nie aangaan nie.

melaney

Die SA verteenwoordigers sal terugkom met hulle bevindinge: zimbabwe benodig dringend ‘n paar miljard Amerikaanse dollars om die regering aan die gang te hou, asook petroleum en krag vir die land. Verder sal daar geen probleme in zim bevind word nie.

Marius

Mnr , die land waar jy veronderstel is om in beheer te wees val uit mekaar maar jy bekommer jou oor n ander land , regtig ? Ek verstaan dit glad nie .

koos10

CR, wat gaan aan met jou? Jou land is in ‘n algehele verval, maar jy kies om PPE’s aan Kuba te gee, en stuur mense na Zimbabwe.

Werner

Arme Zim dis nou klaar praat met hulle