Sahpra ondersoek sterftes ná entstof

Sahpra sê omvattende ondersoeke word na die sterftes gedoen. (Grafiek: Unsplash)

Die Suid-Afrikaanse Reguleringsowerheid vir Gesondheidsprodukte (Sahpra) ondersoek verskeie sterftes wat voorgekom het nadat mense entstof teen Covid-19 ontvang het.

Die owerheid het die parlement Woensdag op die hoogte gebring van die stand van die land se entstofprogram.

Volgens Sahpra word 28 sterftes in hierdie stadium ondersoek. Hiervan was 24 sterftes wat voorgekom het nadat mense die Pfizer-entstof ontvang het en vier sterftes het voorgekom nadat mense die Johnson & Johnson (J&J)- entstof ontvang het. Meer Suid-Afrikaners het wel reeds die Pfizer-entstof ontvang.

Volgens Boitumelo Semete-Makokotlela, uitvoerende hoof van Sahpra, is daar verskeie newe-effekte wat die owerheid ondersoek wat na afloop van die toediening van die entstof aangemeld is. Die sterftes vorm deel daarvan.

“Ons moet vasstel of die gebeurtenis inderdaad verband hou met die entstof en of dit verband hou met iets anders,” sê Semete-Makokotlela.

“Dit is baie omvattende studies wat gedoen gaan word. Nadoodse ondersoeke sal gedoen word, die geskiedenis van ander medikasie wat die individu gebruik het sal nagegaan word. Dit is nogal ʼn breedvoerige proses.

“Terwyl die ondersoek gedoen word, neem ons kennis van die sterftes en ons monitor dit.

“Wat ons kán sê is dat die sterftes nie meer is as wat algemeen onder die publiek sou voorkom nie,” sê Semete-Makoktlela.

Teen Woensdagaand is net meer as 5,8 miljoen mense in Suid-Afrika teen Covid-19 ingeënt. Hiervan het net meer as 4,7 miljoen mense die Pfizer-entstof ontvang. Naastenby 3,8 miljoen mense het ʼn eerste dosis ontvang, terwyl net meer as 950 000 mense reeds hul tweede dosis van die entstof ontvang het. Net meer as ʼn miljoen mense het tot dusver die J&J-entstof ontvang.

Sahpra sê algemene newe-effekte wat ná die toediening van die entstof aangemeld is, sluit in ʼn verhoging in bloeddruk, borspyn, asemnood en floute.

Teen 7 Julie is 3 730 negatiewe reaksies aangemeld. Hiervan is 2 487 newe-effekte ná die toediening van die J&J-entstof ontvang (77% onder vroue) en 1 243 voorvalle van newe-effekte is na die toediening van die Pfizer-entstof ontvang (66% onder vroue).

Ivermektien

Semete-Mokoktlela sê daar is in hierdie stadium geen bewys dat ivermektien byvoorbeeld help om hospitaalopnames of komplikasies weens die siekte te verminder nie, en ook geen bewyse dat dit enigsins sterftes verminder nie.

“Ivermektien behoort nie as roetine in die bestuur van enige fase van Covid-19 gebruik te word nie, behalwe binne die konteks van ʼn kliniese proef.”

Semete-Mokoktlela sê daar is ook onvoldoende bewyse om aan te beveel dat ivermektien vir die behandeling van Covid-19 gebruik word.

Sahpra het sedert Januarie 632 aansoeke vir die gebruik van ivermektien ontvang. Hiervan het hy 60 verwerp terwyl vyf aansoeke verdubbelings van ander aansoeke was.

Daar is in hierdie stadium geen aansoeke vir die registrasie van ivermektien vir die behandeling van Covid-19-infeksies nie. ʼn Ivermektien-room vir die behandeling van sekere velsiektes van die gesig is wel geregistreer. Sahpra het ook ʼn aansoek ontvang vir die registrasie van ʼn ivermektien-tablet vir die behandeling van sekere tropiese siektes.

Die hospitaalgroep Mediclinic het Woensdag ook gesê daar is in hierdie stadium steeds onvoldoende kliniese data om die gebruik van ivermektien in pasiënte met Covid-19 aan te beveel.

Mediclinic sê dr. Emmanuel Taban, ʼn longspesialis verbonde aan Mediclinic Midstream, het waargeneem dat twee uit elke drie pasiënte wat tydens die derde vlaag vir Covid-19-verwante sorg aanmeld, ivermektien gebruik het omdat hulle geglo het dit gaan hulle teen die opdoen van die virus beskerm, of ʼn ernstige vorm daarvan verhoed.

Deel van: SA-nuus

Koronanuusbrief

Wil jy op hoogte bly van alle nuus oor Covid-19 op Maroela Media? Teken in op die nuusbrief.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

133 Kommentare

jongste oudste gewildste
Genis

Ek vertrou dit nie… net my eie opinie…

Swerwer

Het Pfizer-entstof ontvang en was vir 2 dae siek, sit nou nog met kroniese hoofpyn en lyfseer, voel of ‘n trein oor my is.

Pierre

28 sterftes teen duisende wat aan Covid dood is, dankie ek sal my kans vat met die enstof.

Ja wat

Ek is nie seker maar was daar nie dalk sterftes in die 80’s toe ons inenting gekry het maar sosiale media was nie daar om ons op hoogte te hou?Dit is seker maar soos enige medikasie wat newe effekte het?Ken baie mense hier en oorsee wat Pfizer gehad het en geen probleme.Dan ook Laerskool Kruinsig se hoof is gister oorlede van C19 het hy entstof ontvang weet iemand dalk?RIV Dr. Kruger.

Chris dupreez

Ek het Phizer enstof ontvang, alreeds my tweede dosis, en geen newe effekte getoon. Dit hang sekerlik van persoon tot persoon af, hoekom weet ek nie.