‘SA’ners moet seker maak oor visums’

Lindiwe Sisulu, minister van internasionale betrekkinge (Foto: ANA)

Lindiwe Sisulu, minister van internasionale betrekkinge, het Dinsdag ʼn beroep op Suid-Afrikaners gedoen wat oorsee reis, veral na China, om seker te maak hulle het voldoende reisdokumente en visums.

Dit volg ná sewe Suid-Afrikaners, insluitend die 19-jarige Tristan-Lee Niemand, uit ʼn tronk in Jiangsu-provinsie in China vrygelaat is en binnekort gedeporteer sal word.

“Ek is dankbaar die nagmerrie is verby vir die families. Ons doen weer ʼn beroep op jongmense om seker te maak hulle het die regte dokumente en om die ambassades te kontak om die inligting te verifieer wat hulle van werwingsagentskappe ontvang,” het Sisulu gesê.

Volgens die departement van internasionale betrekkinge en samewerking (Dirco) sal Suid-Afrikaanse diplomate in China steeds met die skole en plaaslike owerhede saamwerk om seker te maak dat alle reisreëlings [vir die sewe persone] gefinaliseer word en hulle “so vinnig as moontlik” op pad kan wees huis toe.

Niemand is een van minstens 100 Suid-Afrikaners wat in China aangehou word oor visum-oortredings. Sy word sedert November in Nanjing aangehou en haar gesin en die departement het sedertdien onverpoosd gewerk om haar terug te bring huis toe. Haar pa, Richard Bridger, het aan die Cape Times gesê hy het nog nie enige kontak met sy dogter gehad sedert sy in aanhouding geneem is nie. Hy het verduidelik sy dogter sou Engels gaan gee in China deur ʼn agentskap wat onderneem het om vir haar ʼn werksvisum te bekom. Sy was daar met ʼn studentevisum.

Intussen het Dirco bevestig nog agt Suid-Afrikaners wat in die Zheijang-provinsie in China aangehou is, sal op 23 Desember terug na Suid-Afrika gedeporteer word. Die reëlings rakende hul terugkeer sal getref word sodra hulle vrygelaat is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
Paul

Moenie skuld uit deel nie, vat verantwoordelikheid en staan hulle by, sommer daar van die begin by die aansoek af!

jaco

sonder regstellende aksie en BEE sal al hierdie werksoekery in ander lande ook nie nodig wees nie

Rabes

Dit is die plig van binnelandse sake om toe te sien dat die aansoeker die regte dokumente hê. Nou wil hulle die probleme op jan publiek skywe. Wie weet wat is die korrekte dokumente?

zoom zoom

Hoekom moet ons visums hê vir China as SA deur die regerende party aan China so stuk stuk verkoop word.

Gertryda

My dogter het in Sjina, khazakstan, vietnam en nou in Kambodija onderwys gegee . Dit is elke persoon se eie verantwoordelikheid om dokumentasie te kry
Gebruik n geakrediteerde maatskappy om al jou dokumente te verifireer en om vir jou werke te kry
Sy het nog nooit n probleem gehad nie