Sassa sal afgekeurde Covid-19-aansoeke heroorweeg

(Argieffoto)

Die Suid-Afrikaanse Agentskap vir Maatskaplike Sekerheid (Sassa) sal afgekeurde Covid-19-aansoeke hersien en bepaal waarom dit verwerp is.

Paseka Letsatsi, woordvoerder van Sassa, het in ʼn verklaring gesê die hoë getal afgekeurde aansoeke het vrae laat ontstaan en Sassa het besluit dit sal deugsaam wees om die aansoeke eers te heroorweeg voor dit aan ʼn appèlproses onderwerp word wat duur en tydrowend sal wees.

“Byna 50% van aansoeke het vroeg in Junie nie gekwalifiseer volgens die kriteria nie. Meer as 70% van die afgekeurde aansoeke het óf WVF-voordele ontvang of daarvoor gekwalifiseer, aldus die databasis wat Sassa gebruik het om deur die aansoeke te sif,” het Letsatsi verduidelik.

“Sassa het gevolglik besluit om ʼn bygewerkte databasis te versoek om die afgekeurde WVF-sake te hersien, in plaas daarvan dat die betrokke aansoekers appèl moet aanteken.”

Uit dié proses het dit aan die lig gekom dat 85% van die WVF-sake wat vroeër nie goedgekeur is nie, eintlik kwalifiseer. “Dit moes goedgekeur gewees het en die persone word individueel in kennis gestel waar ʼn gunstige besluit geneem is. Elke betrokke persoon sal ʼn SMS ontvang wat versoek dat hulle bankbesonderhede moet verskaf. Dit is belangrik om so vinnig as moontlik op die SMS te reageer en op die skakel klik wat verskaf word.”

Letsatsi het gesê persone, wie se aansoeke goedgekeur word, moet nie die skakel met enigiemand anders deel nie, omdat elke skakel met ʼn spesifieke ID-nommer verbind word vir vertroulikheidsredes.

Meer as twee en ʼn half miljoen aansoekers het reeds ʼn betaling ontvang van die meer as 3,2 miljoen persone wat aansoek gedoen het vir die Covid-19-toelaag.

Sassa werk ook saam met die departement van maatskaplike ontwikkeling om die proses te finaliseer waarvolgens persone appèl kan aanteken indien hulle voel dat hul aansoeke onregverdig afgekeur is. Die proses sal binnekort op die webwerf https://www.sassa.gov.za/ beskikbaar wees.