Senekal: ‘Daar is baie mense wat hom ondersteun’

André Pienaar (51) tydens Dinsdag se betoging buite die hof op Senekal.

Die regsverteenwoordiger van André Pienaar, die boer van Senekal wat in hegtenis geneem is ná Dinsdag se gewelddadige betoging op die dorp, sê sy het steeds geen klagstaat ontvang nie.

Die polisie het wel vroeër gesê dat die 52-jarige boer op aanklagte van opsetlike saakbeskadiging en openbare geweld in hegtenis geneem is. Volgens die polisie was nog inhegtenisnemings boonop op hande.

Ilanie Oberholzer, Pienaar se prokureur, sê hulle is in hierdie stadium steeds besig met die proses om aansoek te doen om borgtog. Ingevolge wetgewing moet Pienaar egter teen Vrydag in die hof verskyn nadat hy Woensdag aangekeer is.

Hy word tans weens veiligheidsredes by ʼn ongenoemde polisiestasie aangehou.

“Daar is baie mense wat hom ondersteun. Ek het oproepe van reg oor die land en selfs uit Botswana gekry. Hy het werklik ʼn goeie ondersteuningsnetwerk,” het Oberholzer gesê.

Volgens haar gaan dit onder die omstandighede ook goed met Pienaar en sy gesin.

Duisende mense het Dinsdag opgeruk na die landdroshof op Senekal waar Brendin Horner, ʼn jong plaasbestuurder, se vermeende moordenaars vir die eerste keer in die hof verskyn het. Horner se liggaam is Donderdagoggend vroeg in ʼn veld op ʼn plaas buite Paul Roux ontdek.

Sekwetje Mahlamba en Sekola Matlaletsa is kort ná die moord op Horner in hegtenis geneem. Tydens hul hofverskyning was daar eise dat hulle aan die skare gewys of selfs oorgelewer moet word en in die daaropvolgende oproer is ʼn polisievoertuig onder meer omgestoot en het dit aan die brand geraak. Daar is egter geen duidelikheid oor wie hiervoor verantwoordelik was nie.

Die departement van justisie het intussen gesê hofsake sal weens die skade wat aan die hofgebou op Senekal aangerig is, eers weer Maandag voortgesit word. Slegs sake wat met gesinsgeweld verband hou sal verwerk word.

“Die departement veroordeel die voorvalle van vandalisme van staatseiendom ten sterkste en vra om verskoning vir enige ongerief wat die tydelike opskorting van dienste moontlik vir die publiek kan inhou,” het Steve Mahlangu, woordvoerder van die departement, gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
Ja Wat

Malema kyk daai man se arms so dik soos jou lyf.

Martiens

Maar Malema se makkers kan weg kom met erger as die, en op vrye voet wees binne n paar ure? Dit is belaglik man!

Androclus

Daar’s geen skade daar nie,hulle wil net nie werk nie.Kan hulle so oordryf.

Persheks Adri

Watter vandalisme? Nou wil almal kla oor dit, maar as EFF so iets doen is dit heeltemal ok? Belaglik man

andre

Hulle moet bietjie wys wie regtig die polisievoertuig aan die brand gesteek het .Waar daar n rokie trek ……lui die gesegde.