Sluier gelig oor Amy-Leigh se ontvoering  

Tharina Human, Laetitia Nel en Pieter van Zyl in die beskuldigdebank. Foto: Christel Cornelissen

“Hierdie misdaad was beplan, dit het nie sommer net gebeur nie.”

Só het konst. Clayton George Motlaung Donderdag getuig in die borgtogaansoek van die drie mense wat beskuldig word van die opspraakwekkende ontvoering van die sesjarige Amy-Leigh de Jager in Vanderbijlpark vroeër vandeesmaand.

Motlaung het heelwat besonderhede bekend gemaak oor die beplanning en uitvoering van die ontvoering waarvan Tharina Human, Laetitia Nel en Pieter van Zyl beskuldig word. Hulle staan tereg op aanklagte van afpersing en ontvoering – klagtes wat, indien hulle skuldig bevind word, tot tronkstraf van tussen 15 jaar en lewenslank kan lei.

Motlaung het getuig Amy-Leigh is omstreeks 08:00 voor die skool ontvoer nadat die man wat haar by haar ma, Angeline, gegryp het, eers haar vyfjarige boetie gegryp en toe weer laat gaan het. Hy het weggejaag in ʼn wit Toyota Fortuner. Enkele minute later het Amy-Leigh se pa, Wynand, ʼn foonoproep gekry waarin ʼn losprys van R2 miljoen vir haar vrylating geëis is.

Tharina Human en Laetitia Nel in die beskuldigdebank. Foto: Christel Cornelissen

Motlaung het getuig hoe die selfoonrekords van dié foonoproep die polisie Maandag, op die dag van die verdwyning, na ʼn kleinhoewe in die omgewing van Sebokeng gelei het. Daar was egter geen spoor van die Fortuner nie. Die eienaar kon ook nie nagespoor word nie, omdat die nommerplate verwyder is.

Hy het getuig dat die foonrekords gewys het dat dieselfde nommer ook ʼn nommer op ʼn kleinhoewe buite Vanderbijlpark gebel het. Die polisie is na dié perseel, Nel se woning, waar hulle al drie beskuldigdes aangetref het. Hulle het gevra vir Nel se selfone, maar kon nie enige van haar fone met die losprys-oproep verbind nie.

Amy-Leigh het enkele ure later, in die vroeë oggendure van Dinsdag, saam met ʼn paartjie by die polisiekantoor opgedaag, nadat hulle haar in Shakespearestraat aangetref het, het Motlaung getuig. Sy is daarna vir mediese ondersoeke geneem.

Teen Woensdag het die polisie verdere selfoonrekords bekom, wat hulle wéér na Nel se huis op die kleinhoewe gelei het. Dieselfde vrae is weer aan haar gestel, het Motlaung getuig.

Amy-Leigh de Jager (Foto: Facebook)

“Beskuldigde nommer twee [Nel] het erken dat sy betrokke was by die pleeg van die misdaad.”

Nel het volgens die ondersoekbeampte gesê die plan was Human se idee en dat Van Zyl ook betrokke was. Sy is in hegtenis geneem en is saam met die polisie na Van Zyl se huis. Hy was nie tuis nie. Die huis was leeg en net sakke het rondgestaan. Die polisie het die huis deursoek en beslag gelê op ʼn vuurwapen.

Hulle is daarna na Human se huis, waar sy saam met haar agtjarige dogter aangetref is.

Human het volgens Motlaung aan die polisie erken dat sy ʼn Nigeriër geld geskuld het en dat dié persoon gedreig het om haar eie kind te ontvoer en leed aan te doen. Sy het geld nodig gehad om hom te betaal en só het die plan vir ʼn ontvoering tot stand gekom.

Volgens Motlaung gaan ʼn staatsgetuie tydens die verhoor getuig dat daar aanvanklik verskeie ander ontvoeringsplanne bewimpel was. Die oorspronklike plan was – volgens dié getuie – dat Nel en Van Zyl vir Human moes ontvoer. Dié plan en verskeie ander is egter laat vaar en daar is eindelik besluit om Amy-Leigh te ontvoer. Human is Amy-Leigh se boetie se klasonderwyseres en ken die De Jager-gesin goed.

Tharina Human in die beskuldigdebank. Foto: Christel Cornelissen

Die ontvoering is die volgende oggend uitgevoer. Die persoon wat Amy-Leigh gegryp en met haar in die Fortuner weggejaag het, woon op dieselfde kleinhoewe as Van Zyl. Hy is steeds soek.

Die Fortuner, wat aan Nel behoort, is later in haar motorhuis gekry.

Motlaung het getuig die saak het nie net vir Amy-Leigh en haar gesin geruk nie, maar ook die Laerskool Kollegepark en die breër gemeenskap. “Die voorval het buite die skoolhek gebeur, waar kinders veronderstel is om veilig te wees.”

Die drie beskuldigdes het reg deur die hofverrigtinge kop onderstebo gesit. Human het in ʼn stadium saggies begin huil.

Die saak word ná ete voortgesit.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

71 Kommentare

jongste oudste gewildste
Sanna

Deuterononium 28

Arno Scheepers

Geen parool……lewenslank.

OS

Gooi die sleutel weg! Laat die 3 rot vir die volgende 100j

Michael P

Kon niemand iets agter kom dat daar fout met die juffie is nie gewoonlik waar dwelms betrokke is.is daar gewoonlik n verandering in so n persoon se gedrag.

Chid

Stuur die 3 Nigerie toe…vir ewig.