Staat gee R230 miljard vir Eskom oor volgende dekade

Tito Mboweni, minister van finansies, lewer die 2019-begrotingsrede [20 Februarie 2019]. (Foto: Elmond Jiyane, GCIS)

Tito Mboweni, minister van finansies, het Donderdag aan LP’s gesê die nasionale tesourie gaan oor die volgende dekade na verwagting nog R230 miljard in Eskom inpomp.

Mboweni het die parlementêre portefeuljekomitee oor finansies toegespreek ʼn dag nadat hy sy begrotingsrede in die parlement gelewer het.

Mboweni het gesê die verwagting is dat die tesourie R23 miljard elke jaar aan Eskom sal moet gee sodat die kragvoorsiener sy skuld kan dek.

“Dit sal vir tien jaar wees, so R230 miljard. Ek dink in die boek het ons R69 miljard gesit,” het hy gesê.

Mboweni het gister in sy begrotingsrede gesê die staat sal R23 miljard per jaar vir die volgende drie jaar aan Eskom gee.

Ian Stuart, waarnemende adjunk-direkteur-generaal vir die nasionale tesourie se begrotingskantoor, het gesê beamptes het besluit dat Eskom R150 miljard sal nodig hê om sy boeke te balanseer, en as daardie bedrag oor tien jaar gedelg word, sal dit op R23 miljard per jaar neerkom.

Stuart het bygevoeg die berekeninge om te bepaal hoeveel ondersteuning die sukkelende kragvoorsiener sal nodig hê, is ingewikkeld aangesien baie veranderlikes in ag geneem moes word, insluitend tariefverhogings en wisseling in die vraag na elektrisiteit.

Hy het gesê die prentjie mag dalk oor die komende jare verander, maar die tesourie het besluit om die bedrae in die begrotingsrede in te sluit om te voldoen aan internasionale graderingsagentskappe se behoefte vir optimale deursigtigheid.

“Daar is baie mense wat hieraan werk en na die syfers kyk… Tot ʼn mate moet nog baie werk gedoen word, maar ons het groot besluite gehad om te neem toe ons hierdie begroting saamgestel het. Ons het besluit om net so deursigtig as moontlik te wees.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Afrikaner

Hierdie ANC skoolgeld het net nie einde nie, jaar na jaar na jaar, so hou dit nou al vir 24 jaar aan en so sal dit aanhou solank hulle die kitaar slaan.

As WF en kie dit geweet het dat hulle destyds ‘n onbekostigbare perd opgesaal, wat sou hulle met die wigte en teenwigte gedoen het?

Maar hulle wou nie luister nie.

Adam

Om nog geld aan Eskom te verskaf is omtrent so effektief as om suurstof aan ‘n kadawer te gee. Kry die bestuur reg, kry die verlore kundigheid terug, verminder die salarisrekening en bedryf Eskom soos ‘n besigheid bedryf moet word.

Genugtig

Ek weet hierdie is ‘n gesinsvriendelike nuusblad, maar: in die woorde van ‘n nie-so-bekende-akteur (so onbekend dat ekself nie kan onthou nie) ‘Oh my insignificant left (sensored)’. I rest my case, Your Honor. Ons is geskroef.

James

Ja POMP nog geld in die ouens wat vat se sakke

pieter

Julle weet dit kom van die sjinese af