Verskeie brande in die omgewing van die Tafelberg Nasionale Park (TMNP) in die Wes-Kaap het die sluiting van talle gewilde staproetes en voetpaaie genoodsaak.
Volgens Wilderness Search and Rescue (WSAR) is die brande wat Saterdag in die park aangemeld is, deur weerlig veroorsaak.
Gebiede wat geraak word, is die Cecilia-bos, Silwermyn en die hoofroete na Kaappunt.
Die brande is tans onder beheer en verskeie nooddienspanne, insluitend die park se eie reaksiespanne, Kaapstad se brandweerdienste en vrywilligers van WSAR, was Sondagoggend steeds op die toneel.
“TMNP het brandbestryders van die hoofroete na Kaappunt na ʼn brand bokant Skeleton Gorge en die Hely-Hutchinson-reservoir teen Agter-Tafelberg in die park herontplooi,” het die WSAR Sondag gesê.
“Brandweerspanne en lughulpbronne is met dagbreek vanoggend [Sondag] ontplooi om die brand bokant Skeleton Gorge in bedwang te bring en te bestuur. Lugsteun moet ongelukkig weens sterk wind gestaak word, totdat dit weer veilig is om waterbomme uit die lug te gooi.”
Staproetes wat intussen gesluit is, is die roetes van Gifkommetjie tot by Sirkelsvlei en alle roetes uit die rigting van Olifantsbos. Die Sirkelsvlei-staproete en Linkweg-fietsryroete by Kaap die Goeie Hoop is ook geraak en tot verdere kennisgewing gesluit. Die sirkelroete is ook as voorkomingsmaatreël gesluit.
Alle voetpaaie van Kampsbaai en Houtbaai na Agter-Tafelberg is gesluit. Staproetes by Constantianek, die Cecilia-bos, Kirstenbosch en Oranjekloof is ook toe.
Besoekers aan die park word gemaan om uiters versigtig te wees – veral in die omgewing van Silwermyn.
Alweer kwaadwillige brandstigters aan die werk??