Só het Flip Buys, voorsitter van die Solidariteit Beweging, gesê in reaksie op die geliefde en bekroonde digter se afsterwe Woensdag.
“Hierdie stelling mag geyk klink, maar daar is min mense oor wie ná hul afsterwe onteenseglik gesê kan word dat hul bydraes wyd geag word oor die terreine van die letterkunde, digkuns, drama, prosa en godsdienstige literatuur.”
Meer as 150 wetenskaplike artikels het uit sy pen gekom, terwyl vertalings uit Frans deel was van sy omvattende begrip van die letterkunde, ook buite Suid-Afrika. “Die meer as 20 toekennings en ander pryse vir sy werk staan vandag as monumente vir sy onuitwisbare invloed op die Afrikaanse literêre terrein. Hy mag nie meer met ons wees nie, maar daar is troos uit sy eie mond oor sy heengaan.”
In “Allofonie”, Allotroop (1985) staan die volgende:
“Niks bly
soos dit is nie. Soos snoei
is ook aanplant sny …”
“Terwyl ons dus sy wegsny uit ons midde betreur, is dit wat hy vir Afrikaans geplant het onteenseglik en onuitwisbaar. Ons eer sy nagedagtenis,” het Buys gesê.
Klik hier vir alle vorige berigte oor prof. TT Cloete op Maroela Media.