Twee mense het reeds vóór die Ballito Rage in KwaZulu-Natal positief getoets vir Covid-19, maar nietemin besluit om dié byeenkoms by te woon.
Altesaam 848 mense wat die byeenkoms tussen 27 November en 4 Desember verlede jaar bygewoon het, het kort daarna positief getoets vir die koronavirus. Slegs twee van dié pasiënte was Rage-werkers, die res was almal feesgangers.
Dít luidens ’n verslag deur die Nasionale Instituut vir Oordraagbare Siektes (Nios).
Die instituut het ’n ondersoek van stapel gestuur nadat ’n dokter van Hillcrest in KwaZulu-Natal hom vroeg in Desember in kennis gestel het van verskeie jong mense wat positief getoets het vir Covid-19 nadat hulle Ballito Rage bygewoon het.
Nios het gevolglik ’n terugwerkende ondersoek van 2 253 feesgangers waaronder 1 954 feesgangers en 299 werkers van stapel gestuur. Die ondersoek het ’n vraelys ingesluit wat aan 1 814 Rage-gangers of Rage-werkers gestuur is.
Slegs 1% van diegene aan wie die vraelys uitgestuur is, het uiteindelik daarop geantwoord.
Die ondersoek het nietemin aan die lig gebring dat twee feesgangers reeds voor die Rage positiewe SARS-CoV-2-uitslae gehad het, maar steeds besluit het om die geleentheid by te woon.
“Dit dui op gebrek aan dissipline en onverantwoordelike risikogedrag onder feesgangers aangesien daar min of geen nakoming van die aanbevole voorkomingsmaatreëls was nie,” lui die verslag.
Volgens Nios het dieselfde soort gedrag geblyk by die Tin Roof-superverspreidingsbyeenkoms in Oktober in Claremont in die Wes-Kaap. “Hierdie soort byeenkomste moet as onnodig beskou word en vir die duur [van die pandemie] verbied word.”
Só lyk die syfers van die Rage-gangers wat positief getoets het per provinsie:
Provinsie woonagtig | Aantal Covid-19-gevalle |
Oos-Kaap | 4 |
Vrystaat | 2 |
Gauteng | 561 |
KwaZulu-Natal | 254 |
Limpopo | 1 |
Mpumalanga | 11 |
Noordwes | 0 |
Noord-Kaap | 0 |
Wes-Kaap | 15 |
Onbekend | 0 |
Totaal | 848 |
Dié ouderdomsgroepe is veral getref
Nios het ook bekend gemaak dat die meeste van Suid-Afrika se Covid-19-gevalle tydens die eerste én tweede vlaag van die virus onder die 30-34-ouderdomsgroep en 35-39-ouderdomsgroep voorgekom het.
Ouderdomsgroep | Gevalle gedurende eerste vlaag van die virus | Gevalle gedurende tweede vlaag van die virus |
0-4 | 3 104 | 5 465 |
5-9 | 3 577 | 6 927 |
10-14 | 6 099 | 11 542 |
15-19 | 9 758 | 20 582 |
20-24 | 14 149 | 33 556 |
25-29 | 27 332 | 49 157 |
30-34 | 34 000 | 55 633 |
35-39 | 34 319 | 57 087 |
40-44 | 29 273 | 49 730 |
45-49 | 26 766 | 48 283 |
50-54 | 23 305 | 44 507 |
55-59 | 18 502 | 38 675 |
60-64 | 11 088 | 29 589 |
65-69 | 6 250 | 20 337 |
70-74 | 4 106 | 14 503 |
75-79 | 2 704 | 8 665 |
80 en ouer | 3 783 | 8 954 |
onbekend | 1 719 | 4 629 |
Poging tot moord?
Slegs indien die staat bo alle redelike twyfel kan bewys dat almal by daai 2 aangesteek het. Al wat daai 2 hoef te sê is dat daar n moontlikheid bestaan dat die res dalk by n asimptomatiese familielid of vriend aangesteek het, of die volgende oggend in n winkel. Die moontlikhede vir oordrag is legio.
Virseker aanklabaar.
‘n Helse pak slae. Dodelike virus infeksie, maar ‘n rage is soooo aanloklik.
Ek hoop hulle sowel as hul ouers word strafregtelik aangekla.
A nee a! ‘n Ouer moét in so geval sy /haar voet neersit.
Hulle moet verantwoordelik gehou word vir hierdie onverantwoordelikheid. So ook die ouers wat geweet het hulle is positief, maar hulle steeds laat gaan het. Hoeveel wetsgehoorsame mense het gesterf agv sulke onverantwoordelikheid. En wat van die organiseerders. Dit se my hulle het geen temperature geneem nie want dan moes die positiewe mense mos opgespoor kon word.
Ek hoop daar word stappe teen hulle geneem