Uiteenlopende reaksie op beslissing oor ou SA vlag

Die ou Suid-Afrikaanse vlag.

Heelwat uiteenlopende reaksie is ontvang ná die gelykheidshof Woensdag beslis het die vertoon van die ou Suid-Afrikaanse vlag kom in sekere kontekste op haatspraak neer.

Maroela Media het vroeër berig adjunk-regter-president Phineas Mojapela het bevind die ongegronde vertoon van die ou vlag word nie beskerm onder vryheid van uitdrukking nie. Mojapelo sê die swaai van die vlag is verdelend, pynvol en gaan verder as haatspraak: dit is teistering.

Dít beteken dat die ongegronde tentoonstelling van die vlag, byvoorbeeld by ʼn sportbyeenkoms, verbied word. Die vertoon daarvan word steeds in byvoorbeeld museums en akademiese konteks toegelaat.

Die Nelson Mandela-stigting (NMS) het die aansoek by die gelykheidshof ingedien en die Menseregtekommissie (MRK) was die tweede aansoeker in die saak.

Die stigting het ná die uitspraak gesê alle Suid-Afrikaners het rede om die beslissing te vier. “Ons land het nodig om die wonde van die verlede te genees. Om dít te doen, moet ons erken wat gebeur het en nie wegskram van die geskiedenis nie, maar daarna kyk en dit noem wat dit is.

“Dit beteken ons kyk na ons geskiedenis en noem apartheid ʼn misdaad teen die mensdom en ʼn growwe menseregteskending. As ons ontken wat gebeur het, gaan die geskiedenis vir ewig by ons spook,” het die NMS gesê.

Die burgerregtegroep AfriForum het die beslissing as ʼn terugslag vir vryheid van spraak bestempel, maar sê dat dit nie die organisasie se aktiwiteite of standpunte direk raak nie. Die organisasie sê hy vertoon nie self die vlag nie en ontmoedig ander mense om dit te doen.

Ernst Roets, hoof van beleid en strukture by AfriForum, het gesê daar moet duidelikheid wees oor die lyn tussen vryheid van spraak en haatspraak. “Ons kommer met hierdie saak was van meet af dat ʼn uitspraak in die NMS se guns nie die doel sal dien wat hy beoog nie, aangesien staatsregulering met betrekking tot vryheid van spraak meestal tot groter probleme lei.”

Hy het gesê AfriForum is steeds oop vir gesprekvoering oor nasionale kwessies.

Die Herstigte Nasionale Party het gesê vir Afrikaners is die vlag ʼn simbool van orde, beskawing, vooruitgang, vryheid, respek vir kulturele verskille en ʼn Christelike bestel.

“Die vlag wat die ANC op ons afdwing, is ʼn simbool van verdrukking, moord, wanorde, verval, kultuurvertrapping, rassehaat en ʼn antichristelike bestel. Wat die Afrikanervolk betref, is dít haatspraak en verteenwoordig dit uitsprake soos ‘Kill the Boer’,” het Louis van der Schyff, hoofsekretaris van die HNP, gesê.

Die Afrikanerbond (AB) het gesê die vertoon van die ou landsvlag was omstrede, maar dat die beslissing die deur open vir ánder simbole om onderdruk te word. “Sommige mense beskou dit as ʼn simbool van geskiedenis en Afrikaner-erfenis, terwyl ander dit as ʼn simbool van apartheid en wit oppergesag beskou,” het Jan Bosman, hoofsekretaris van die AB, gesê.

“Misdaad, korrupsie, staatskaping en ekonomiese ineenstorting gebeur wel onder die huidige vlag. Om die simbool weg te neem los nie die probleem op nie.

“Om ʼn Suid-Afrikaner te wees verg deesdae ʼn groter gesindheid van ruimte en begrip, van respek en verantwoordelikheid. Ons Suid-Afrikaanse diversiteit vra dit van ons. Net so moet ons ook begrip en respek hê vir mekaar se geskiedenis. Om die vertoon van die ou vlag in te perk stel mense teen mekaar op, in plaas daarvan om mense nader aan mekaar te bring.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

76 Kommentare

jongste oudste gewildste
JP

As dit nie rassisties is nie wil ek nie weet hoe lyk rassisme nie

Linda

Hierdie behoort elke mens se persoonlike keuse te wees, of jy nou die Ou Vlag of die Nuwe Vlag in jou huis te hou. Persoonlik sal ek die Nuwe Vlag verkies, sodat my kleinkinders vertroud daarmee kan word, en nie deurmekaar kan wees eendag tussen ons Ou Vier kleur en die Nuwe Vlag nie ! Vir die volgende 100 jaar gaan ons Land in elk geval onder die ANC bewind wees.

sdp

Hoekom sluit kommentaar net skielik oor die spesifieke onderwerp??

Rina

Ons is ook nou al naar en siek vir al hierdie ongeskikte beskuldigings. Kry.n lewe en stop al hierdie moorde . Verkragtings . Inbrake … dagga rokery….. drugs. Eish

tom

Daar gaan n dag kom