Vakbond pak BLF ná uitsprake oor dood van kinders

Lindsay Maasdorp. Foto: Facebook

Solidariteit het Dinsdag bekendgemaak dat die vakbond reeds opdrag aan sy prokureurs gegee het om hofstukke op te stel om Lindsay Maasdorp, die woordvoerder van Black First Land First (BLF), aanspreeklik te hou vir sy uitsprake ná die Hoërskool Driehoek-tragedie.

Verskeie ouers en vriende van die slagoffers het Solidariteit genader om regstappe teen Maasdorp te doen. Hy het verlede week die kinders se dood op sosiale media verwelkom en dié uitsprake het wye reaksie ontlok.

“Hoewel dit nie die eerste keer is dat Maasdorp homself skuldig maak aan rassistiese uitsprake nie, is sy onlangse opmerkings ʼn nuwe laagtepunt. Ons as samelewing behoort nie iemand te duld wat die dood van kinders vier bloot omdat hulle wit is nie. Uitsprake het gevolge en dit hoort nie in ons samelewing nie. Hier moet dus ʼn duidelike boodskap uitgestuur word dat sulke uitsprake veragtelik en onwelkom is,” het Connie Mulder, hoof van die Solidariteit se Navorsingsinstituut, gesê.

Volgens Anton van der Bijl, hoof van arbeidsregdienste by Solidariteit, beplan Solidariteit ʼn drieledige regstrategie wat onder meer ʼn crimen injuria-klag teen Maasdorp en ʼn klag ingevolge die Gelykheidswet insluit.

“Maasdorp het ʼn strafregtelike oortreding begaan en ons is van mening dat hy ʼn swaar straf verdien,” het Van der Bijl gesê.

Volgens Van der Bijl sal Solidariteit ook die klag wat hy verlede jaar teen die BLF by die Onafhanklike Verkiesingskommissie (OVK) aanhangig gemaak het in die lig van die onlangse gebeure hersien.

“ʼn Party wat homself skuldig maak aan rassisme mag nie toegelaat word om aan die demokratiese proses deel te neem nie en ons sal dit ook sodanig by die OVK argumenteer.”

Mulder het aangedui dat Solidariteit die hofaksie en regstrategie wat hy teen BLF gaan doen volgende week tydens ʼn mediakonferensie bekendmaak. Die mediakonferensie word uitgestel tot ná die begrafnisse van die vier leerders wat in die voorval gesterf het.

MRK spreek skok uit

Die Suid-Afrikaanse Menseregtekommissie (MRK) het Dinsdag ook sy ontsteltenis oor Maasdorp se uitsprake op sosiale media oor die tragedie uitgespreek.

“Die kommentaar is onsensitief, aanstootlik en onvanpas. Dit strook glad nie met die ideale en aspirasies van ons grondwetlike demokrasie nie. Goedhartigheid, deernis en respek is basiese menslike waardes wat ons in ʼn tyd van verlies moet laat blyk,” het Gail Smith, woordvoerder van die MRK, gesê.

Smith het bygevoeg die kommissie erken dat vryheid van spraak ʼn grondwetlike reg is, maar die reg kan nie uitgeoefen word op ʼn manier wat inbreuk maak op ander se menswaardigheid of enige ander regte wat die Grondwet beskerm nie.

Die MRK het Dinsdag teen 12:00 sowat 80 klagtes ontvang wat verband hou met die neerhalende kommentaar rakende die Hoërskool Driehoek-tragedie.

Smith het gesê die kommissie sal die gelykheidshof nader om ʼn beslissing te maak oor Maasdorp se uitsprake op sosiale media. “Ons sal die meriete van elke klagte beoordeel voordat daar besluit word hoe om verder op te tree.

Die kommissie het ook sy meegevoel met die ouers, gesinne, klasmaats, onderwysers en vriende van die leerders wat dood is, bevestig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

51 Kommentare

jongste oudste gewildste
Zack

Goed gedoen Solidariteit. Nou hou Gerrie Nel homself besig met Ford se hofsake en hy is nie beskikbaar waar ons hom nou nodig het nie. Maak ‘n voorbeeld van Maasdorp en sorg dat hy tronkstraf kry.

Boland

Net na VBS se skandaal is die EFF skielik baie meer stil en die BLF baie meer uitgesproke.Hierdie organisasies word vanaf een plek beheer.Laat mens wonder.

Se ek ook

Vervolg asb Sinyanda Dizzy Gumede op facebook ook. Volgens sy kommentaar voel hy geen pyn vir die wit kinders wat gesterf het nie.

Anoniem

Laat Hy KRY wat hy VERDIEN !

Hy moet KANS kry om op SY eie, in stilte, sy onsensitiewe uitsprake te bepeins !

Daar is ‘n eenvoudige spreekwoord wat maklik is om te onthou : WAT JY SAAI SAL JY MAAI ?

sdb

Ja nee, ek se ook tronkstraf. Boetes werk nie, want dis nie hy wat gestraf word nie, maar wel sy oningeligte aanhangers. HY MOET DIE STRAF DRA VIR SY WOORDE. Nes die Momberg vrou ..