Verkiesing: Publiek kan nou beswaar teen kandidate aanteken

Argieffoto

Suid-Afrikaanse burgers wat beswaar wil aanteken teen enige van die kandidate wat benoem is vir die algemene verkiesing op 8 Mei vanjaar, sal moet spring aangesien daar beperkte tyd is om dit te doen.

Die Onafhanklike Verkiesingskommissie van Suid-Afrika (OVK) het Donderdag gesê burgers het slegs kans tot 2 April om hul besware in te dien. ʼn Lys van die kandidate wat aan die verkiesing deelneem is vanaf vandag op die OVK se webtuiste beskikbaar. Lede van die publiek het geleentheid tot 17:00 op Dinsdag 2 April om besware in te dien.

Meer as 10 000 kandidate is benoem om aan die nasionale verkiesing deel te neem en meer as 8 000 kandidate vir die provinsiale verkiesings.

“Dit is aansienlik meer as die verkiesing in 2014 toe 2 089 kandidate vir die nasionale stembrief benoem is en 6 562 kandidate vir die provinsiale verkiesings,” het die OVK in ʼn verklaring gesê.

Volgens die Verkiesingswet mag besware ingedien word teen kandidate op grond van die volgende:

  • Hulle is nie gekwalifiseerd om verkiesbaar gestel te word nie;
  • Die voorgeskrewe aanvaarding van benoeming is nie deur die kandidaat onderteken nie;
  • Daar was geen voorneme deur die kandidaat onderteken dat hy of sy gehoor sal gee aan die OVK se gedragskode nie.

Volgens die Grondwet kan enige landsburger hom- of haarself verkiesbaar stel om verkies te word vir die nasionale vergadering en/of die provinsiale wetgewer, behalwe:

  • Ongerehabiliteerde insolvente
  • Enigiemand wat deur ʼn hof as geestelik versteurd verklaar is
  • Enige persoon wat skuldig bevind is aan ʼn strafregtelike oortreding en tot langer as 12 maande tronkstraf gevonnis is sonder die opsie van ʼn boete. Hierdie diskwalifikasie verstryk vyf jaar nadat die vonnis uitgedien is.

Besware teen enige kandidate kan per hand ingedien word by die OVK se hoofkantoor of per e-pos gestuur word na [email protected]. Die beswaar moet die persoon wat die beswaar indien se volledige besonderhede insluit, asook die naam, ID-nommer en party van die kandidaat waarteen die beswaar ingedien word sowel as die rede vir die beswaar en ondersteunende dokumentasie vir die beswaar.

Die OVK sal alle besware oorweeg en ʼn beslissing daaroor maak teen 8 April. Enige persoon of party wat daarna ʼn besluit van die kommissie wil betwis, het dan kans tot 11 April om die verkiesingshof te nader.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
potkop

een van die dae is daar meer kandidate as stemmers…
Geen wonder die land sit waar dit sit nie.

sweis

Waar kan ek kla oor die DA raadslede in die moot wat niks doen en salarise ontvang?

Willie

Ek stem Sweis, die Moot lyk verwwardeloos, en wetteloos… Ek het nog om te sien hoe die DA n verskil maak..

Realis

Stem saam oor die raadslede in die Moot. Hulle speel presies dieselfde kaart as die ANC. Die ANC blameer alles wat hulle opvoeter op Apartheid. Die DA blameer al hulle tekortkominge weer op die ANC. Die Moot gaan gebukkend onder ‘n enorme hoeveellheid infra struktuur probleme. Waterlekke daagliks, kragonderbrekings daagliks (bo-op die gewone beurtkrag). Dit is ook nou al ‘n jaar of twee wat ons ‘n verandering moes gesien het.

IK

Elke land het die regering wat hy verdien.