Verskeie stappers oor naweek gered

(Foto: Wildernis-soek-en-redding (WSAR)/Facebook)

Noodreddingspanne was die afgelope naweek fluks aan die werk met verskeie reddingspogings nadat heelparty stappers op verskillende plekke landwyd in die moeilikheid beland het.

Lede van Wildernis-soek-en-redding (WSAR) moes hulle Saterdag na die Kirstenbosch- nasionale botaniese tuin haas nadat ʼn vrou op ʼn staproete op Tafelberg geval en haar been beseer het.

Die 24-jarige stapper was op die Ledges-staproete wat strek tussen Duiwelspiek en Tafelberg tot by die noordoostelike punt van die berg. Daar is verskeie steiltes op die roete.

David Nel, woordvoerder van WSAR, sê die stapper was op ʼn steil gedeelte van die roete, hoog bo Nuweland, toe sy gegly en ongeveer twee meter ver geval het.

“Sy het haar been beseer en kon nie verder stap nie,” sê hy.

“Haar medestapper het dadelik hulp ontbied.”

ʼn Klein span het die Wes-Kaapse departement van gesondheid se noodreddingshelikopter gebruik om na die toneel te vlieg. Hulle het die afgeleë rand, waar die stappers gestrand was, bereik en hulle na veiligheid gehys. Die stappers is na ʼn landingsone by Kirstenbosch geneem en die beseerde vrou is na ʼn hospitaal vir behandeling geneem.

Volgens Nel het die reddingspoging egter so hittete nie heeltemal seepglad verloop nie.

“Terwyl die span besig was met die redding, het ʼn verbygaande stapper die reddingspoging onderbreek en daarop aangedring om eers by die rand af te klim sodat sy met haar staptog kan voortgaan.

“Intussen het die helikopter bo dié rand gehang,” sê Nel.

“Ondanks die span se pogings om vir die stapper te beduie om weg van die helikopter te beweeg of te stop, het sy voortgegaan om in die rigting van die helikopter te beweeg.

“Een van die noodreddingswerkers het gou gespring om die stapper uit die pad na veiligheid te neem.”

Nel sê as die stapper aanhou beweeg het, sou die wind van die helikopter haar moontlik van die krans afgewaai het.

“Hierdie voorval het amper in ʼn tragedie geëindig,” sê hy.

“Dit wys presies wat die risiko vir omstanders tydens noodreddingsoperasies is. Ons doen ʼn beroep op alle bystanders om reddingsoperasies te vermy of na reddingspanne se instruksies te luister om hul eie veiligheid, dié van die pasiënt en die reddingspan te verseker.”

(Foto: Wildernis-soek-en-redding (WSAR)/Facebook)

Nóg ʼn ure lange reddingspoging

Paramedici en lede van die Suid-Afrikaanse soek-en-reddingsdiens (SARZA) is Saterdag ook na ʼn staproete in die omgewing van Waterval-Boven in Mpumalanga ontbied.

ʼn 62-jarige man het tydens die staptog geval en ʼn beenbreuk bo die enkel opgedoen.

Dit het die noodreddingspanne uiteindelik nege uur lank geneem om die pasiënt na veiligheid te bring.

Ross Campbell, woordvoerder van ER24, sê ses paramedici, nege lede van SARZA en drie plaaslike stappers was Saterdag om 18:00 al op die toneel. Dit het egter twee uur lank geduur om die steil terrein tot by die beseerde stapper af te lê.

“Die span het met hul aankoms die pasiënt ondersoek en weens die omvang van sy beserings besluit om hom te dra met sy been in ʼn spalk en ʼn vakuummatras om hom sodat sy liggaam nie te veel beweeg nie,” sê hy.

“Met geïmproviseerde toukatrolle het die span dit reggekry om die pasiënt teen 03:00 Sondag van die berg af te bring.”

Die man is kort daarna na die Mediclinic Nelspruit geneem vir behandeling.