Video: BLF reageer ná leier sê ‘wit mense sal doodgemaak word’

Andile Mngxitama waarsku as Johann Rupert die taxibedryf op die BLF loslaat, sal hulle vyf wit mense doodmaak vir elke swart mens wat doodgemaak word.

Black First Land First (BLF) het Maandag ontken dat dié party se leier, Andile Mngxitama, rassehaat aangeblaas het tydens ʼn toespraak die afgelope naweek in Potchefstroom.

Mngxitama het opslae veroorsaak toe hy tydens die toespraak onder meer gesê het vir elke swart mens sal die organisasie “vyf wit mense doodmaak”. Mngxitama het die uitlatings gemaak na aanleiding van die sakemagnaat Johann Rupert se onderhoud met die radiostasie Power 98.7 waartydens hy gesê het hy sal die taxibedryf gebruik om hom teen die EFF te beskerm.

“Hier is ʼn boodskap aan Johann Rupert,” het Mngxitama in die omstrede toespraak gesê. “Johann Rupert, dis in die haak. Betaal die taxibedryfbase. Maar dis hoe dit is: Vir elke mens wat deur die taxibedryf doodgemaak word, sal ons vyf wit mense doodmaak.

“Vir elke swart mens, sal ons vyf wit mense doodmaak. As julle een van ons doodmaak, sal ons vyf van julle doodmaak.” Nadat hy dié belofte vier keer herhaal het, bulder hy: “Ons sal die kinders doodmaak, die vroue, hul honde en hul katte…. Ons sal enigiets doodmaak wat ons op ons pad vind.”

Zanele Lwana, BLF-woordvoerder, het Maandagoggend by navraag gesê die BLF sal nie toelaat dat die situasie van die 1980’s, toe die Nasionale Party volgens hulle die IVP betaal het om “swart mense dood te maak”, herhaal word nie.

Die BLF sê dit was Rupert, nie hulle nie, wat rassehaat aangeblaas het toe hy gesê het hy sal “die taxibedryf loslaat op die EFF” om hom teen dié party te beskerm omdat hy kwansuis dié bedryf beheer. “Ons het bloot gereageer op sy uitlatings,” sê Lwana.

Ons sal nie swart mense aanval nie, maar onsself verdedig teen wit mense.

“Ons sal nie toelaat dat [Rupert] swart mense gebruik om ons aan te val nie. Ons sal nie swart mense aanval nie, maar onsself verdedig teen die wit mense wat hulle stuur om ons aan te val.”

Sy sê die BLF het nog nie klagtes ontvang oor die video wat hulle op YouTube geplaas het van die partyleier se toespraak Saterdag in die Ikageng-stadion in Potchefstroom nie.

“Maar daar is mense wat ons standpunte wanvoorstel asof ons geweld aanstook en rassehaat aanwakker. Mag ons dan nie reageer nie, maar Rupert kan doen wat hy wil?”

Die wit gemeenskap wys baie gou ʼn vinger na die BLF.

Sy sê Mngxitama se oproep in sy toespraak om vyf wit mense dood te maak vir elke swart mens wat doodgemaak word, is bloot ʼn reaksie op Rupert se uitlating. “Die wit gemeenskap wys baie gou ʼn vinger na die BLF, maar niemand het iets te sê oor Rupert se ‘dreigement’ nie.”

Die BLF sal nie toelaat dat Rupert “ons swart broers en susters oorreed om ons dood te maak nie”.

Maroela Media het die Suid-Afrikaanse Menseregtekommissie gekontak om te hoor of die kommissie enige klagtes oor Mngxitama se uitlatings ontvang het, maar die kommissie se woordvoerder sal eers vanmiddag beskikbaar wees vir kommentaar.

https://www.youtube.com/watch?v=rdZd7U-ghPA&feature=youtu.be

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

166 Kommentare

jongste oudste gewildste
Wurmpie

En wat gaan met hom gebeuer

Dirk

Die man soek net publisiteit. Niemand gee hom aandag nie, nou maak hy ekstreme uitlatings.

Gerd Lourens

Probeer gerus, windbal!!!

Snowball

Net soos ‘n by in ‘n bottel, dit zoem maar gaan nêrens nie…..

Arak

Wat die hart van vol is loop die mond van oor. In Andile se geval is dit duidelik vol haat, bitterheid en afguns. Die menseregte kommissie sal vir hom een of ander belaglik (sagte) straf gee, maar jy geagte wit mens, tel maar jou woorde, want vir ons geld ‘n ander stel wette en reëls.