[Video] Man verlam ná kleinhoewe-aanval: ‘Ek sukkel elke dag van my lewe’

Braam Blignaut is sedert die aanval verlam en in ‘n rolstoel. Foto: Verskaf

Op 10 Julie 2015 is Braam Blignaut en sy gesin op ʼn kleinhoewe in die Buffelsfontein-omgewing buite Rustenburg in Noordwes deur twee gewapende aanvallers oorval. Blignaut is vier keer in sy bolyf geskiet en is sedertdien heeltemal in sy onderlyf verlam.

Hy het gevolglik sy werk as voorman by die Tharisa-myn verloor, wat hom en sy gesin in finansiële probleme gedompel het. In ʼn video wat Dinsdag op sosiale media gedeel is, vertel Blignaut hoe sy lewe handomkeer verander het sedert die voorval.

“Dit is nou twee jaar ná die aanval,” sê Blignaut (36) in die video terwyl die trane oor sy wange stroom. “Die mens wat sê dit raak beter wanneer jy verlam is, lieg. Dit raak nie beter nie. Ek het nie net die vermoë om te loop verloor nie, ek het ook die vermoë verloor om vir my familie te sorg. Vir twee jaar lank word ek elke nag van my lewe weer geskiet as ek daardie aanval moet herleef. Ek herleef daardie oomblik elke dag van my lewe.”

Maroela Media het vroeër berig Blignaut was die aand van 9 Julie tydens die nagskof aan diens toe sy vrou hom gebel het om te sê dat sy bang is omdat sy die honde buite hul huis hoor blaf. Blignaut se skof het om 02:00 geëindig en hy het daarna huis toe gejaag om te sien wat aangaan. Oomblikke nadat hy buite die huis stilgehou het, het twee aanvallers hom by sy voertuig oorval.

Die aanvallers het Blignaut in die huis ingedwing waar hulle hom en sy vrou, Izulda, vasgebind het. Sy vier kinders, toe twee, vier, sewe en 10 jaar oud, moes in die sitkamer sit terwyl die aanvallers die huis omgekeer het.

Izulda kon in ʼn stadium daarin slaag om te vlug en na die bure te hardloop om hulp te ontbied. Die aanvallers het haar agternagesit en verskeie skote op haar afgevuur. Een van die aanvallers het teruggedraai en in die huis vyf skote op Blignaut afgevuur waarvan vier hom getref het. Die aanvallers het kort daarna op die vlug geslaan met twee selfone, R250, ʼn kamera en ʼn hangertjie.

Volgens Gerda Steyn het Braam Blignaut self hierdie toestel ontwerp wat hom in staat stel om regop te staan omdat hy graag weer sy vrou wou vashou. Foto: Verskaf

Blignaut se rugsenuwee is in die aanval beskadig en hy is 64 dae lank in die hospitaal behandel. Hy het net 45 kg geweeg toe hy uiteindelik ontslaan is en as ʼn parapleeg teruggekeer het huis toe.

Gerda Steyn, Blignaut se ma, het aan Maroela Media gesê Blignaut was nog onder verdowing in die hospitaal toe hy al deur sy werk in kennis gestel is dat hy nie weer sal kan terugkeer werk toe nie. Volgens Steyn het die gesin ook nooit weer teruggekeer na die kleinhoewe ná die aanval nie en woon hulle sedertdien in ʼn huis in Rustenburg. Die Blignaut-egpaar het intussen begin om lasersnywerk op klein skaal te doen om ʼn inkomste te genereer.

“Ons het vir Braam kort nadat hy uit die hospitaal ontslaan is by ʼn stamselspesialis in Mpumalanga gehad. Die behandeling het aanvanklik tot ʼn mate gehelp, maar later veroorsaak dat hy baie erge spasmas gekry het,” vertel Steyn. “Toe hy hierdie behandeling gekry het, was daar nog beenfragmente in sy rugmurg en ontsettend baie swelling. Indien daar nou weer ʼn MRI-skandering gedoen word, sal die prentjie baie anders lyk as toe. Daar is ʼn stamselspesialis in Parys [in die Vrystaat] wat glo hy kan Braam help, maar ons het doodeenvoudig nie die geld om vir die behandeling te betaal nie.”

Steyn sê Blignaut het intussen ook gewig opgetel sedert hy uit die hospitaal ontslaan is en gevolglik is sy rolstoel nou te klein. Dit veroorsaak dat sy bene teen die rolstoel druk en druksere veroorsaak. Hy kry ook druksere op sy boude, maar geen van die akademiese hospitale waar hy al gaan aanklop het vir hulp, is bereid om hom op te neem om dit te behandel nie.

“Ek wil net so graag hê ʼn mediese spesialis met kennis van rugmurgbeserings moet Braam ondersoek en kyk of hy hom kan help. Braam kry pyne in sy lies, hoewel hy verlam is. Dit moet tog ʼn goeie teken wees? As ʼn dokter net na hom kan kyk en kyk of daar nie ʼn manier is wat hy gehelp kan word nie. Ek wil net so graag my seun help om sy lewe meer draaglik te maak. Ek wil net weer sien hoe hy glimlag,” sê Steyn hartseer.

Volgens Steyn het die polisie aan haar gesê dat een van die aanvallers sedert die aanval dood is, maar dat die tweede aanvaller nog op vrye voet is.

“Braam kry baie swaar sedert die aanval, maar die hele familie ly saam met hom. Dit is verskriklik moeilik om hom so te sien. Gister toe ons die video gemaak het, was die eerste keer wat hy oopgemaak het oor die aanval en eerlik daaroor gepraat het. Toe hy begin huil, het ons almal saam gehuil. Elke dag is moeilik.”

Kyk hier na Braam Blignaut se vertelling van die aanval en hoe sy lewe daardeur geraak is:

This how crime affects familys in South Africa! This is my son Braam Blignaut story! I want this video to go viral all over the world so that everyone can see what happend to him and his wife and 4 sons! They are dependend now on donations help them! Braam need so much to go and see a specialist and a stem cell specialist to see if there really nothing to be done for him and make his life more bearable! Pain, infections and severe spasms is a part of his life! Please support them in their struggle and make their live better! If anyone want to donate please donate at I.S Blignaut Absa / acc ; 9324353196 branch 632005Savings account. Swift Code: ABSAZAJJPlease put the word "DONATE" with every donation! Thank you and God Bless!

Posted by Gerda Herbst on Tuesday, June 6, 2017

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

47 Kommentare

jongste oudste gewildste
Lea

Hoekom moet die uitvaagsels soveel smart veroorsaak en daarmee wegkom?!

Wie

Ek voel die staat moet hiervoor verantwoordelik gehou word. Hulle deel huise en ander geskenke uit vir “ander” mense wat deur misdaad geraak is, maar hierdie arme man wat nie meer kan werk nie wat indirek deur die staat se onvermoe om sy burgers veilig gehou word verlam is, moet nou sukkel om die mas op te kom? Dalk moet daar ‘n voorbeeld gemaak word en ‘n ordentlike regspersoon hom verteenwoordig en ‘n vet eis teen die staat instel. Hoeveel mense het nou al hulle broodwinners op die manier verloor? Sommige verlam, ander word gedood in plaasaanvalle? En steeds draai… Lees meer »

Lee

Ai dis gladnie lekker nie. Ek hoop en bid van harte dat daar ‘n uitkoms vir die familie sal wees. Dis niks lekker. Kan hulle nie Jakaranda se “Good Morning Angels” kontak vir hulp nie? Hulle doen sulke wonderlike werk. Ek dink hy moet die myn waar hy gewerk het CCMA toe vat want jy kan nie net iemand afdank nie. Dis gemeen. Sterkte vir die familie en ek hoop regtig daar sal gou ‘n uitkoms wees sodat hy hulp kry.

Wonder maar net

Kan ‘n werkgewer ‘n persoon se dienste in so ‘n geval net beeindig? Moet daar nie gekyk word na mediese ongeskiktheid nie?

Rianie Castelyn

Dit maak my woedend! Laat weet asseblief hoe mens skenkings kan maak aan die familie.