[Video] Zuma: ‘Snaakse idee van demokrasie om minister af te dank’

Pres. Zuma tydens Donderdag se vraesessie.

Pres. Zuma tydens Donderdag se vraesessie.

President Jacob Zuma het Donderdag ontken daar is ʼn krisis oor die welsyntoelae en het eise dat Bathabile Dlamini, minister van maatskaplike ontwikkeling, afgedank moet word, beskryf as ʼn “snaakse” idee van hoe demokrasie werk.

Mmusi Maimane, leier van die DA, het Zuma tydens ʼn mondelinge vraesessie in die parlement gevra of hy nie dink dis tyd dat Dlamini verwyder word nie. Zuma het geantwoord hy het gedink die datum waaroor gepraat word, 1 April, het nog nie aangebreek nie. “Dis ʼn ander soort demokrasie as jy dink iemand gaan misluk en moet gestraf word nog voordat hulle het. Dis ʼn snaakse demokrasie om iemand te straf voordat hulle ʼn fout begaan het,” het Zuma geantwoord.

Zuma het verder gesê daar is nie ʼn krisis met die situasie waarin die Suid-Afrikaanse agentskap vir maatskaplike sekerheid (Sassa) gedompel is met die uitbetaling van maatskaplike toelaes nie.

Hoofregter Mogoeng Mogoeng het egter Woensdag in die konstitusionele hof die situasie as ʼn krisis bestempel. Die hof lewer Vrydagoggend uitspraak in die aansoek dat die hof ʼn toesigrol moet speel in die uitbetaling van toelaes.

Zuma het ook vir Faith Muthambi, minister van kommunikasie, in die bresse getree. “Die oppergesag van die reg sê nie jy moet iemand straf omdat jy vermoed die persoon gaan ʼn misdaad pleeg nie. Dit is amper soos die wet van die oerwoud.”

Dlamini en Muthambi is van onbevoegdheid beskuldig oor hul hantering van onderskeidelik die Sassa-krisis en die situasie by die SAUK. Zuma het egter volgehou dit is onmoontlik om aan opposisiepartye se eise te voldoen. “Dit is te veel gevra van die president. Sodra ons dit doen, gaan ons sê die president is ʼn diktator. Hy besluit net, selfs al is daar geen feite nie. ”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

57 Kommentare

jongste oudste gewildste
Pietshom

O my genade ek skud net my kop.

tom

Zuma die nar

Gideon

Mnr Intelligensie!!!! So slim!!!Wat kan ek se?

Johann

Hys al SO gewoond aan LIEG en BEDRIEG; hy glo homself! Of hyt n besonderse toegeneendheid teenoor.die twee “dames”? Faith het bv al twee vrae sesssies misgeloop want sy was saam met NUMBA WHONE op n “amps”besoek? HUIS VAN HOOF HANDPOP EN SY ZUMAIKIES

Johan. H.

Hier is 2 woorde bo vermeld wat n mens nie in dieselfde sin gebruik nie.