Werkgewers in Suid-Afrika wil dié poste vul

Pnet het die neiging van afstandswerk op grond van geadverteerde poste vir afstandwerk of ʼn hibriede model ondersoek. (Foto: Freepik)

Die aanlyn loopbaanportaal Pnet sê in sy jongste verslag oor werkneigings poste in die betaalstaat- en salarisafdeling (finansiële sektor) in steeds in groot aanvraag.

Die vraag na persoonlike assistente en vakatures in klanteondersteuning, in die administrasie-, kantoor- en ondersteuningsektor is volgende op die lys van posisies wat werkgewers wil vul. Hierna volg poste vir verpleegkundige en professionele versorging (in die mediese en gesondheidsektor) en dan verteenwoordigers of verkoopskonsultante.

• Geboue en konstruksie

Op ʼn jaargrondslag het die vraag na werkers in die geboue- en konstruksiebedryf met 14% gestyg. Ondanks minder aanstellings in die eerste twee maande van die jaar, word meer mense steeds gewerf as ʼn jaar gelede.

• Argitektuur en ingenieurswese

Aanstellingsaktiwiteit in dié sektor het op ʼn jaargrondslag ook met 14% toegeneem. Hoewel aanstellings oor die afgelope drie maande effens afgeneem het, bly die tendens positief met stabiele indiensnemingsgeleenthede.

• Vervaardiging- en monteringsektor

Indiensnemingsbedrywighede in die vervaardiging- en monteringsektor het met 13% gestyg. Daar was verhoogde werwingsaktiwiteit in November verlede jaar en sedertdien was daar voortgesette werwing in vergelyking met ʼn jaar gelede.

Afstandwerk in SA

Met die streng inperking wat in 2020 weens die Covid-19-pandemie in Suid-Afrika ingestel is, moes werkgewers groot aanpassings doen – onder meer met werkers wat van die huis af moes werk – om sake aan die gang te hou.

Die inperkings het daarna diepgaande veranderinge in die wêreld van werk en werkplekke tot gevolg gehad.

Tradisionele kantoorwerk het vinnig na afstandswerk oorgeskakel, met werknemers wat gewoond geraak het om van die huis af te werk deur aanlyn platforms vir kommunikasie en samewerking te gebruik.

Hierdie verskuiwing het aanpassings in werkroetines en praktyke genoodsaak, asook die aanvaarding van nuwe tegnologie om afstandwerk te vergemaklik. Boonop het ondernemings streng gesondheid- en veiligheidsprotokolle ingestel om mense te beskerm en die nakoming van sosiale afstand en higiëne-riglyne te verseker.

Die pandemie het die belang van buigsaamheid, veerkragtigheid en innovering onderstreep om ongekende uitdagings in die werkpleklandskap te pak, lui Pnet se verslag.

Afstand- en hibriede werkmodelle bly steeds algemeen, maar die vraag is toenemend hoeveel nuwe geleenthede vir afstandwerk beskikbaar is.

Pnet het die neiging van afstandswerk op grond van geadverteerde poste vir afstandwerk of ʼn hibriede model ondersoek. Die bevindinge wys hoewel die meeste poste nie meer afstandwerk as opsie bied nie, dit tog nog gebeur.

Sekere marksektore bied ook meer geleentheid vir afstandwerk as ander.

Terwyl die inligtingtegnologiesektor (IT) al afstandwerk voor die Covid-19-pandemie ingestel het, het ander sektore, soos sake en bestuur, finansies, administrasie en kantoor- en ondersteuningsdienste, asook verkope tydens die pandemie in die IT-sektor se voetspore gevolg.

Pnet sê in sy verslag dit is belangrik om daarop te let dat poste met afstandswerkopsies geneig is om dieselfde poste te wees wat in groot aanvraag is. Dit kan dit moeiliker maak om poste te vul. Gevolglik moet werkgewers meer aantreklike en buigsame werkomstandighede aanbied om talent met die regte vaardighede te lok.