(Foto verskaf deur Woolworths)
Woolworths herroep sy Peanut Butter Dairy Ice Cream met onmiddellike effek.
“Slegs ons grondboontjiebotter-roomys word herroep. Alle ander Woolworths-produkte wat grondboontjiebotter bevat, insluitend ons reeks grondboontjiebotter, bly 100% veilig vir verbruik,” het die onderneming in ʼn verklaring gesê.
Daar is vroeër vandeesmaand bevind dat sommige Suid-Afrikaanse produkte, wat grondboontjiebotter bevat, hoër vlakke van aflatoksien bevat as wat regulasies toelaat.
Woolworths het sy grondboontjiebotter vir aflatoksien getoets en daar is bevind dat dit veilig is vir verbruik.
Aflatoksien is ʼn gifstof wat afgeskei word deur sommige soorte muf, waaronder grondboontjies, mielies en ander graanprodukte. Dit kan kanker veroorsaak.
“Dit moet egter in baie hoë hoeveelhede ingeneem word voor dit gevaarlik is vir mense,” lui Woolworths se verklaring.
Sedert ander rolspelers in die bedryf hul produkte herroep het, het Woolworths stelselmatig al sy sekondêre produkte begin toets wat ook grondboontjiebotter bevat, soos koekies, souse, pretzels, energiestafies en roomys. “Dit is slegs as ʼn voorsorgmaatreël gedoen om seker te maak dat al ons produkte aan ons streng gehaltestandaarde voldoen.”
Tydens dié proses is daar bevind dat Woolworths Peanut Butter-roomys hoër vlakke aflatoksien bevat as wat regulasies toelaat. “Ons verwyder dit dus van ons rakke. Klante wat die produk aangeskaf het, kan dit na hul plaaslike winkel neem vir ʼn volledige terugbetaling.”
Woolworths sê hy bly verbind tot uitnemende gehalte. “Ons streng voedselveiligheidbestuurprosesse verseker dat alle kos wat ons vervaardig, verpak en verkoop, aan die gehalte voldoen wat Woolworths-klante verwag.”
