Zuma oor plaasmoorde gevra

Pres. Jacob Zuma tydens ‘n vorige geleentheid in die Nasionale Vergadering. Foto: Elmond Jiyane/GCIS

Pres. Jacob Zuma is Donderdag oor plaasmoorde uitgevra toe LP’s wou weet wanneer ʼn heeltydse nasionale polisiekommissaris aangestel gaan word.

Dr. Pieter Groenewald, leier van die VF Plus, wou by Zuma weet wanneer die polisiekommissaris aangestel gaan word. Zuma het gesê hulle is besig met ʼn proses van werwing en dat die proses baie goed vorder. “Ons is besig met interne prosesse wat tot die aanstelling sal lei. Ek beplan om die polisiekommissaris aan te stel sodra die prosesse gefinaliseer is.”

Zuma het hierna begin praat oor die misdaadstatistieke wat onlangs bekend gestel is. Hy het gesê die vlaag van misdaad en geweld moet deur die polisie hokgeslaan word, maar dat dit ʼn gedeelde verantwoordelikheid vir alle Suid-Afrikaners is.

Groenewald het hierna gesê hy wil spesifiek plaasmoorde onder die president se aandag bring. Hy het gesê misdaad raak Zuma nie aangesien hy ʼn string lyfwagte het. “Is jy bewus van die wreedheid waarmee plaasmoorde gepaardgaan?” wou Groenewald weet. Hy het gesê die slagoffers van plaasmoorde word gemartel deur onder meer kookwater op hulle uit te gooi of dit in hul kele af te dwing.

Groenewald het gesê misdaad in die land is buite beheer en hy wou verder by die president weet of die nuwe polisiekommissaris iemand sal wees wat op meriete aangestel gaan word. “Gaan jy ʼn kommissaris aanstel wat ondervinding het, wat bevoeg is en wat deur die range beweeg het? Of gaan dit ʼn politieke aanstelling wees?”

Pieter Groenewald. Argieffoto: Twitter

Zuma het sy antwoord hierop begin deur tegnies te raak oor ʼn verwysing wat Groenewald oor sy lyfwagte gemaak het. Hy het daarna gesê alle vorige polisiekommissarisse was mense wat bevoeg was en dat nie sommer enigiemand as polisiekommissaris aangestel kan word nie. Hy het nie reageer op Groenewald se vrae oor plaasmoorde nie en net gesê die proses vir die aanstelling van ʼn heeltydse polisiekommissaris duur voort.

Mmusi Maimane, leier van die DA, wou by Zuma weet wat geword het van sy beloftes dat spesiale eenhede weer op die been gebring sal word om spesifieke misdade te teiken. Zuma het hierop geantwoord dat hulle werk aan ʼn plan wat binnekort bekend gemaak sal word en dat dit spesiale eenhede insluit.

“Suid-Afrikaners word nie as kriminele gebore nie. Maatskaplike omstandighede veroorsaak baie druk om kriminele te word.” Hy het gesê die regering simpatiseer met die slagoffers van misdaad. Hy het verwys na bendegeweld in die Wes-Kaap en gesê die minister van polisie is daarheen gestuur en dat hy voorgestel het dat die weermag betrek word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
bgj van der westhuizen

julle mors julle asmen om met hom te praat hulle sit agter alles

Coenraad

Wat ‘n grap!!!!!

John

?.. die hele vraag-antwoordsessie van vandag kom daarop neer dat die president hard besig is om aan planne te werk… Dit was ‘n insiggewende en vrugbare sitting…. Neem kennis mense…

Gerhard

Zuma het bemeester hoe om met soveel woorde moontlik geen antwoord te gee

o

Ek byt op my tande en skryf nie wat ek hiervan dink nie