ʼn Elfjarige seun het veilig in Slowakye aangekom nadat hy sowat 1 200 km alleen van die oorloggeteisterde Oekraïne gereis het.
Die Slowaakse ministerie van binnelandse sake sê die seun, net bekend as Hassan, het die reis met slegs ʼn plastieksak, ʼn klein rooi rugsak, ʼn paspoort en sy familie se telefoonnommer meegemaak. Dié nommer was op sy hand neergeskryf.
Hassan se ma, ʼn weduwee, moes noodgedwonge by hul huis in Zaporizhzhia in die suide van Oekraïne agtergebly, aangesien sy nie haar bejaarde ma kon agterlaat nie.
Julia Pisecka het haar seun per trein laat vlug. Hy is met sy aankoms by die Slowaakse grens deur doeanebeamptes oorgehelp. Hy is later deur vrywilligers ingeneem wat vir hom kos gegee het, terwyl grensbeamptes met familielede in die hoofstad Bratislava in aanraking gekom het.
Die Slowaakse ministerie van binnelandse sake sê nou klein Hassan is ʼn “ware held”, wat verskeie harte aangegryp het met “sy glimlag, vreesloosheid en vasberadenheid”.
Hassan se ma het sedertdien in ʼn video, wat deur die Slowaakse polisie op sosiale media geplaas is, almal bedank wat na haar seun met sy aankoms in Slowakye omgesien het.
“Langs my dorp is ʼn kernkragsentrale wat die Russe gebombardeer het. Ek kon nie my ma agterlaat nie. Sy kan nie op haar eie oor die weg kom nie, so ek het my seun Slowakye toe gestuur,” het Pisecka verduidelik.
Maroela Media het vroeër berig die kernkragsentrale by Zaporizhzhia, ʼn nywerheidstad in die suidooste, is die grootste in Oekraïne. Die land se president, Wolodimir Zelenski, het Moskou Vrydag van “kernterreur” beskuldig nadat Russiese magte dié kernkragsentrale aangeval het.
Hassan is maar een van meer as twee miljoen mense wat reeds uit Oekraïne gevlug het sedert Rusland die land binnegeval het. Meer as 1,2 miljoen het na Pole gevlug, terwyl 140 745 nou in Slowakye skuil.
Pisecka het in haar video gepleit dat Oekraïense kinders ʼn veilige hawe gebied moet word.
Brawe kind. Kan nie eers dink wat hy deurgegaan het nie. En hoe hartseer dit is dat kinders sulke dinge moet deurgaan nie.
Sterkte vorentoe bulletjie. Jy het ‘n hart van staal. Daardie deursettingsvemoë gaan jou nog ver bring.
Ek hoop van harte dat sy ma en ouma gered word.
Daar is duisende sulke kinders in Suid Afrika, maar ek het eintlik net meegevoel met die kind.
Dis eintlik so hartseer. So klein en bloot gestel aan die elemente van ‘n oorlog in sy land.
Dankbaar die seun is veilig en dit was in Ukraine en nie in SA nie. Ons sou van ‘n tragiese einde nou hier gelees het.
“God is watching us…. from a distance…”
Hy is so n brawe jong man, maar die letsels van die oorlog sal vir altyd vasgebrand wees in sy geheue….dis n verskriklike ding om as 11jarige so n tog aan te pak. So bly dat hy veilig is.