Zelenski beskuldig Rusland van ‘kernterreur’

Pres. Wolodimir Zelenski (Foto: Sergei SUPINSKY/AFP)

Wolodimir Zelenski, Oekraïne se president, het Moskou Vrydag van “kernterreur” beskuldig nadat Russiese magte ʼn kernkragsentrale aangeval het.

Hy het wêreldleiers gesmeek om “wakker te word” en te verhoed dat Europa “aan ʼn kernramp sterf” nadat die vasteland se grootste aanleg aan die brand geslaan het nadat dit aangeval is.

“Geen ander land as Rusland het nog ooit op kernkrageenhede geskiet nie,” het Zelenski gesê in ʼn videoboodskap wat deur sy kantoor vrygestel is. “Dit is die eerste keer in ons geskiedenis … in die geskiedenis van die mensdom. Die terreurstaat het hom nou tot kernterreur gewend.”

Die kernkragstasie by Zaporizhzhia, ʼn nywerheidstad in die suidooste, voorsien na raming 40% van die land se kernkrag en huisves volgens Zelenski ses van Oekraïne se 15 reaktors.

Die brand het ontstaan ​​nadat Russiese troepe glo op die fasiliteit geskiet het. “Dit is tenks wat met termiese beeldhouers toegerus is, so hulle weet waar hulle skiet,” het Zelenski gesê.

“Noodsaaklike” toerusting by die stasie was onaangeraak en bestralingsvlakke was normaal, het plaaslike amptenare aan die VN se atoomwaghond gesê.

Oekraïne en Rusland het intussen tydens ʼn tweede ronde van samesprekings ooreengekom om humanitêre deurgange te skep om burgerlikes te laat ontruim.

Pres. Wladimir Poetin (Foto: Andrey Gorshkov /SPUTNIK/AFP)

Wladimir Poetin, die Russiese president, meen dat Moskou se opmars in Oekraïne “volgens plan” verloop, terwyl Zelenski direkte samesprekings met Poetin versoek het as die “enigste manier om die oorlog stop te sit”.

Die EU het Donderdag ingestem om tydelike beskerming goed te keur vir vlugtelinge, tot dusver sowat een miljoen, wat uit die oorlogsgebied in Oekraïne vlug. Pres. Joe Biden het ook tydelik beskermde status verleen aan Oekraïners wat reeds in die land is.

Amerikaanse wetgewers het Biden intussen ook aangemoedig om olie-invoer uit Rusland te verbied as verdere straf vir sy inval in Oekraïne, ʼn stap waarteen die Amerikaanse administrasie tot dusver gekant was. Biden het vroeër gesê dit bly ʼn moontlikheid, maar die Withuis het gewaarsku dat so ʼn stap verdere spronge in oliepryse kan veroorsaak en Amerikaanse verbruikers negatief kan beïnvloed.

Toyota en Volkswagen, die wêreld se twee grootste motorvervaardigers, het bedrywighede by hul Russiese aanlegte opgeskort, terwyl Formule Een vir Rusland as gasheer van die Grand Prix verwyder het. Atlete van Rusland en Belarus sal intussen ook nie meer aan die Paralimpiese Winterspele in Beijing mag deelneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

46 Kommentare

jongste oudste gewildste
Jean

Die man probeer alles om hulp te kry, maar dit is elkeman vir homself in die wereld.

Strandloper

Dog ons het net een maletjie…

Kerrie

Ek wonder hoekom ons nie Rusland se kant van die storie mag hoor nie. Dis soos om jou kind se skool-stories te luister, maar jou kind probeer jou weghou van die skool af, te bang jy wil met die onderwyser gaan praat.

Frikkels

Ou poetin &kie doen waarvoor hulle in die wieg gelê is. Hulle was nog altyd terroriste en kommuniste en hulle sal dit bly. Vandaar ons regering se behoefte om bande met rusland te versterk. Hulle vertroetel ñ giftige adder omdat hulle dieselfde denkwyse het.

Kokerboom

Die wereld is moeg vir vir ideologies verwronge gevoellose kranksinnige magsbehepte leiers wat pyn lyding verwoesting trauma op armlengte aan ander verskaf.