Djokovic erken fout in reisdokumente

Novak Djokovic. (Alfredo Falcone/LaPresse via AP)

Novak Djokovic erken dat daar ’n fout in sy Australiese reisdokumente ingeglip het én dat hy met ’n joernalis byeengekom het nadat hy in Desember positief vir die koronavirus getoets het.

“Dit was ’n oordeelsfout,” gee die Serwiër nou toe.

Die wêreld se voorste manstennisspeler het dié onthullings Woensdag op sosiale media gemaak nadat hy Maandag ’n skokoorwinning behaal het in sy poging om in Australië te bly om aan die Australiese Ope deel te neem.

Hy verduidelik in ’n verklaring op Instagram dat ’n “administratiewe fout” op sy reisverklaring begaan is toe sy agent die verklaring namens hom ingevul en die verkeerde blokkie gemerk het wat sy vorige reisgeskiedenis betref voordat hy verlede week na Australië gereis het.

“Dit was ’n menslike fout en beslis nie opsetlik nie. Ons leef in uitdagende tye tydens ’n wêreldwye pandemie en soms kan hierdie foute voorkom. My span het vandag bykomende inligting aan die Australiese regering verskaf om hierdie saak op te klaar.”

Die onderhoud ná ’n positiewe toetsuitslag

Djokovic erken ook dat hy ’n verpligting met ’n Franse koerant nagekom het nadat hy verlede maand ’n positiewe Covid-19-toetsuitslag ontvang het.

Hy verduidelik dat hy op 14 Desember ’n basketbalwedstryd in Belgrado, Serwië, bygewoon het waarna verskeie mense positief vir die virus getoets het.

“Ten spyte daarvan dat ek geen Covid-19-simptome gehad het nie, het ek op 16 Desember ’n vinnige antigeentoets gedoen wat negatief was. Ek het versigtigheidshalwe ook ʼn amptelike en goedgekeurde PCR-toets op dieselfde dag laat doen.

“Ek het die volgende dag ’n tennisgeleentheid in Belgrado bygewoon om toekennings aan kinders te oorhandig en ’n vinnige antigeentoets afgelê voordat ek na die geleentheid gegaan het. Dit was negatief.

“Ek was asimptomaties en het goed gevoel. Ek het eers ná daardie byeenkoms die kennisgewing van ’n positiewe PCR-toetsuitslag ontvang.”

Hy erken egter dat hy die dag daarna voortgegaan het met ’n onderhoud en fotosessie met L’Equipe aangesien daar lank tevore op die onderhoud ooreengekom is.

“Ek het alle ander geleenthede behalwe die L’Equipe-onderhoud gekanselleer.

“Ek het verplig gevoel om voort te gaan met die L’Equipe-onderhoud, want ek wou nie die joernalis in die steek laat nie. Ek het wel verseker dat ek sosiale afstand handhaaf en ’n masker dra, behalwe wanneer foto’s van my geneem is.”

Die wêreld se voorste manstennisspeler is ná die onderhoud huis toe om te isoleer.

“By nabetragting was dit ’n oordeelsfout en ek aanvaar dat ek hierdie verbintenis moes herskeduleer het.”

Die tennisster sê voorts dit is vir hom belangrik om verkeerde inligting rakende hom reg te stel “veral in die belang om breër kommer in die gemeenskap oor my teenwoordigheid in Australië te verlig, en om sake aan te pak wat seermaak en my familie raak.

“Hoewel ek gevoel het dat dit belangrik is om verkeerde inligting aan te raak en uit te klaar, sal ek geen verdere kommentaar lewer nie uit die grootste respek vir die Australiese regering en hul owerhede en die huidige proses.

“Dit is altyd ’n eer en ’n voorreg om in die Australiese Ope te speel. Die Australiese Ope is baie geliefd onder spelers, ondersteuners en die gemeenskap, nie net in [die staat] Victoria en in Australië nie, maar oor die hele wêreld, en ek wil net die geleentheid hê om teen die beste spelers in die wêreld en voor een van die beste skares in die wêreld mee te ding.”

Maroela Media het vroeër berig Djokovic het sy appèlaansoek gewen nadat Australië sy visum verlede week teruggetrek het omdat hy nie aan die land se toegangsbepalings voldoen het nie.

’n Australiese regter het eindelik in Djokovic se guns beslis en beveel dat hy uit ’n immigrasiesentrum vrygelaat word.

Die tennisster berei tans voor vir die Ope wat Maandag afskop.