Britse owerhede het kringtelevisiebeeldmateriaal vrygestel om die skuldiges vas te trek wat ʼn nuwe standbeeld van die voormalige premier, Margaret Thatcher, met verf gegooi het.
Die beeld is verlede maand in Thatcher se tuisdorp in St. Peters Hill, Gratham, opgerig waar sy in 1925 gebore is. Veiligheidskameras is vroeër by dié terrein aangebring nadat betogers dit kort ná die oprigting daarvan met eiers gegooi het.
Die beeld, wat aanvanklik vir die Parlementsplein in Westminster bestem was, is juis bo-op ʼn drie meter hoë voetstuk geplaas om dit te beskerm. Dit het vandale egter nie afgeskrik nie.
BBC berig dat die oppervlak van die standbeeld beskadig is nadat rooi verf verlede week daarop uitgegooi is.
Owerhede hoop nou dat mense die verdagtes aan hul kenmerkende kleredrag, bouvorm en die manier waarop hulle loop, sal uitken. Albei was in donker klere geklee en hul gesigte bedek. Hier en daar kan kentekens, soos ʼn Nike-handelsmerk, egter op hul kleredrag uitgeken word.