Massagraf in Kanada het meer as 750 grafte

’n Nagwaak is vroeër die maand gehou nadat die oorskot van 215 kinders in ongemerkte grafte in Brits-Columbië ontdek is. (Foto: Cole Burston/AFP)

Die Saskatchewan Eerste Nasie het gesê hy het minstens 751 ongemerkte grafte gevind op die perseel van ʼn voormalige kosskool.

Die Cowessess Eerste Nasie het gesê grond-deurdringende radar het die grafte by die Marieval-kosskool onthul. Volgens die groep is dit die meeste grafte wat tot dusver in Kanada gevind is.

Maroela Media het vroeër berig die grafte is vandeesweek naby die voormalige Katolieke kosskool vir inheemse kinders in Saskatchewan in die weste van Kanada ontdek. Opgrawings om die perseel van die voormalige Marieval Indian Residential School het einde Mei begin nadat die oorskot van 215 leerders sowat ’n maand gelede by ’n ander voormalige Katolieke kosskool vir inheemse kinders in Kamloops, Brits-Columbië, ontdek is.

Die gruvonds plaas weer die kollig op ʼn donker hoofstuk in Kanada se geskiedenis met ʼn hernude versoek aan die pous en die kerk om om verskoning te vra vir die mishandeling en geweld by die skole waar skoliere gedwing is om aan te pas by die land se dominante kultuur.

Opgrawings by die skool het aan die einde van Mei begin ná die oorskot van 215 skoolkinders by ʼn ander voormalige inheemse kosskool in Brits-Columbië gevind is. Ná die oorskot by die Kamloops-skool gevind is, is daar ook met opgrawings by ander voormalige instansies vir inheemse kinders reg oor Kanada begin, met behulp van owerhede.

Sowat 150 000 Amerikaanse Indiane, Mesties en Inuïete is tot die 1990’s verpligtend opgelei in 139 van dié kosskole reg oor Kanada. Hulle is van hul families, taal en kultuur geïsoleer.

Talle is aan mishandeling en seksuele misbruik onderwerp en meer as 4 000 het in die skole gesterf, aldus ʼn Kommissie van Ondersoek wat bevind het Kanada het “kulturele volksmoord” gepleeg teen die inheemse gemeenskappe.

Perry Bellegarde, president van die Kanadese Vergadering van Eerste Nasies, sê die ontdekking is “absoluut tragies, maar nie verrassend nie”. “Ek moedig alle Kanadese burgers aan om saam met Eerste Nasies gedurende hierdie ongelooflike emosionele tyd te staan.”

Die Marieval-kosskool het leerders tussen 1899 en 1997 gehuisves voordat dit gesloop en met ’n dagskool vervang is.

Een voormalige skolier, Barry Kennedy, het ook gesê hy is geskok maar nie verbaas nie. “Tydens my tyd by die Marieval-kosskool het ek ʼn jong vriend gehad wat een aand al skreeuende weggesleep is,” het hy aan die uitsaaier CBC gesê. Hy het die maat nooit weer gesien nie. “Sy naam was Bryan. Ek wil weet waar Bryan is.”

Hy het die geskiedenis van geweld by die skool beskryf.

“Ons is aan verkragting blootgestel. Ons is aan gewelddadige aanranding blootgestel. Ons is blootgestel aan dinge wat nie normaal was vir ons families nie,” het hy gesê. Hy vermoed die grafte wat tot dusver gevind is, is nog net die oortjies van die seekoei. “As mens luister na die stories wat ons vriende en medeskoliere vertel, dan is daar verskeie liggings – jy weet, per skool.”

Talle inheemse gemeenskapsleiers verwag dat nog grafte in die volgende paar maande gevind gaan word. Soektogte het reeds moontlike ongemerkte begraafplase onthul in Ontario en Manitoba.

Menseregtekenners van die Verenigde Nasies het vroeg in Junie, net ʼn paar dae ná die beendere by Kamloops gevind is, Ottawa en die Vatikaan gemaan om dringend ʼn volledige ondersoek van stapel te stuur.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

13 Kommentare

jongste oudste gewildste
Dana

Dit is skokkend. Arme kinders

Bushy

Name them and shame them. Vervolg die oortreders wat moontlik nog leef soos die oorlogs musdadigers van die Tweede Wereld oorlog en onlangse seksuele oortreders vervolg was. Indien nie is daar dubbele standaarde. Selfs die wat reeds dood is moet genoem word.

marius

Hoe vergoed hulle vir dit ? Met geld ? Gedrogte !!

Misky

Dis onmenslik en so baie gevalle soos die daar buite. Kyk die fliek Sleepers en absoluut briljant!!! Tans op Netflix

koos

Ahaaaa….wie was van die voorste grootbekke by die VN toe dit oor sanksies en die vorige SA regering se sogenaamde mishandeling van swart mense gegaan het? Kry vir julle, julle huigelaars!!! Moordenaars van onskuldige kinders, nie eens politieke opponente nie. Waar is die Weste en hulle eiewaan van geregtigheid nou?
My simpatie aan die slagoffers, ek bid en vertrou daar sal vir hulle geregtigheid kom.