Meer as 100 vas oor betogings in Griekeland

Jong mans bestook polisiebeamptes met petrolbomme in Exarchia, Athene (6 Desember 2018) (Foto: AP Photo/Yorgos Karahalis)

Griekse owerhede het gesê meer as 100 persone is in aanhouding in verband met betogings in Athene en die noordelike stad Thessaloniki tydens geleenthede om ʼn tiener, wat 10 jaar gelede deur polisiebeamptes doodgeskiet is, se lewe te gedenk.

Die polisie het Vrydag gesê 66 persone is in Athene in aanhouding sedert die geweld Donderdag begin het. Dertien van die persone is in hegtenis geneem.

Vyftien persone is in Thessaloniki in hegtenis geneem ná 52 persone aangehou is.

Betogers het in Athene versperrings aan die brand gesteek en polisiebeamptes met klippe en vuurwerke bestook. Polisiebeamptes het reageer met traangas, skokgranate en ʼn waterkanon.

Alexis Grigoropoulos (15) is op 6 Desember 2008 oorlede. Sy afsterwe het tot van die ergste betogings in Griekeland gelei. Die geweld het vir twee weke lank voortgeduur en ook na ander gebiede uitgebrei.