NS wil sigarette vir toekomstige geslagte verbied

Argieffoto bloot ter illustrasie. (Foto: Unsplash)

Nieu-Seeland beoog om rook uiteindelik in dié land te verbied deur die ouderdom waarop tabakprodukte gekoop kan word, geleidelik op te hef. Dit beteken dat vandag se tieners in Nieu-Seeland nooit sigarette wettig sal kan koop nie.

Die land verbied tans die verkoop van tabakprodukte aan mense onder die ouderdom van 18 jaar.

Ayesha Verrall, medeminister van gesondheid, het Donderdag aangekondig dat dié ouderdomsverbod vanaf 2027 jaarliks ​​met een jaar verhoog sal word om die volgende generasie rookvry te hou.

Verrall het dié aankondiging as “’n geskiedkundige dag vir die gesondheid van ons mense” bestempel.

“Ons wil seker maak dat mense nooit begin rook nie. Namate hulle ouer word, sal hulle en toekomstige geslagte nooit wettig tabak kan koop nie, want die waarheid is: Daar is geen veilige ouderdom om te begin rook nie.

“Rook is steeds die hoofoorsaak van voorkombare dood in Nieu-Seeland en veroorsaak een uit elke vier kankergevalle,” het die minister gesê.

Die Nieu-Seelandse regering beoog ook om die plekke waar tabak verkoop word te beperk en slegs produkte met lae nikotienvlakke in die mark toe te laat om die gevaar van verslawing te verminder.

Volgens Verrall bevestig die jongste beoogde maatreëls net weer Nieu-Seeland se rol as ’n wêreldwye voorloper in die beperking van tabak. Die land het in 1990 ’n verbod op sigaretborgskappe van sport ingestel, asook ’n rookverbod in kroeë in 2004.

Verrall het gesê rook eis veral sy tol op Maori-gemeenskappe, asook mense in die Pasifiese streek, waar die rookkoers ongeveer dubbel (13,5%) is, vergeleke met die res van die bevolking.

Die regering beoog nou om dit teen 2025 tot 5% te verminder en beraam dat dit eindelik die gesondheidstelsel NZ$5,5 miljard (sowat R58 miljard) in toekomstige uitgawes sal spaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

25 Kommentare

jongste oudste gewildste
Tinus

“Nanny state”

Swerwer

Lekker lag ek nou. Dit sal mense net leer om meer skelm te wees.. Hoe wil hul sy dit toepas/afdwing as ouers dit goedkeur . Regtig? Dink weer want dit is nie haalbaar nie.

Cherokee

Toelaatbare ouderdom geleidelik verhoog?
Beter idee sou wees om rokers ‘n tydperk te gee om die verslawing af te skud, waarna nie meer beskikbaar.

Vryheid, Gelykheid & Geregtigheid

Ek wonder of Nieu Seeland wette het wat die rook van dagga reguleer? En wat van alkohol gebruik? En wat van suiker en stysel verbruik?

VaalDonkie

Eienaardig genoeg is hierdee deel van die VN se “agenda 2030”. Gaan lees maar.