Orkaan Ian dalk rampspoedigste in Florida-geskiedenis

Huise is verwoes en bote lê in die strate. (Foto: Ricardo Arduengo/AFP)

Orkaan Ian het die afgelope paar dae verwoesting gesaai en minstens tien mense het hul lewens verloor nadat dit oor dele van die Amerikaanse deelstaat Florida beweeg het.

Pres. Joe Biden is bevrees dat die dodetal moontlik nog kan styg, wat dié orkaan dan een van die verwoestendste orkane kan maak wat al ooit in Florida se geskiedenis aangeteken is.

Die orkaan het Fort Myers Woensdag getref en in die proses dele van die stad heeltemal platgevee.

Strate het in riviere verander en huise is onder seewater gedompel nadat stormvloede die gebied getref het. Tientalle bote wat in die marina vasgemeer was, het gesink, terwyl ander in die strate in die middestad ronddobber. Bome is boonop omgeruk nadat die volgehoue wind gepaard gegaan het met rukwinde van tot byna 240 km/h.

Owerhede het aan BBC bevestig dat die oorledenes almal in die Charlotte‑distrik, naby Fort Myers, was. Ander plaaslike media skat dat die dodetal egter veel hoër is en reeds 19 sterftes bereik het.

Joseph Tiseo, ʼn plaaslike kommissaris, het aan die BBC gesê die gebied het “sowat 12 ure lank geweldige winde verduur”.

Honderde mense is weens die verwoesting gestrand gelaat, maar reddingspogings is reeds onderweg om hulle uit hul huise te red. Biden het Florida ook as ʼn rampgebied verklaar, wat federale befondsing losgemaak het om die stormgeteisterde gebied by te staan.

“Ons gaan voort om vinnig op te tree om die familie van Florida te help,” het hy getwiet.

“Ek wil hê die mense van Florida moet weet dat ons hulle in hierdie tyd sal bystaan.”

Groot gebiede aan Florida se suidwestelike kus is in duisternis gelaat nadat kragtoevoer weens die storm uitgesny het. Sedert Donderdag is sowat 2,3 miljoen huishoudings en besighede sonder elektrisiteit.

Twee eilande naby aan Fort Myers, Pine- en Sanibel-eiland, wat gewilde toeristebestemmings is, is in wese afgesny toe die snelweg na die vasteland verspoel het.

Sanibel-eiland is “deur ʼn werklike Bybelse stormvloed getref,” het Ron DeSantis, goewerneur van Florida, gesê. Reddingswerkers is steeds besig om inwoners van die eiland per boot en helikopter na veiligheid te neem.

Lughawens het ook intussen alle kommersiële vlugte opgeskort, terwyl skepe ook hul vaarte vertraag of gekanselleer het.

Volgens die land se nasionale orkaansentrum is die orkaan nou sterk op pad na dele van Noord- en Suid-Carolina. Indien die orkaan nog stede tref, kan dit verdere “lewensgevaarlike oorstromings, stormvloede en sterk winde in die gebiede veroorsaak”.

“Ian kan ʼn bietjie meer versterk voordat dit Vrydag hierdie gebiede bereik,” het die sentrum gesê. Hy het bygevoeg dat dit egter waarskynlik “vinnig tussen Vrydag en Saterdag oor die suidoostelike dele van Amerika sal verswak”.