Elizabeth Holmes is tans swanger. (Foto: Justin Sullivan/Getty Images/AFP)
Elizabeth Holmes, een van die wêreld se eerste jong vrouemiljardêrs, is Vrydag ʼn swaar straf opgelê nadat sy beleggers in haar mediese firma Theranos bedrieg het.
ʼn Amerikaanse hof het Holmes (38) tot 11 jaar tronkstraf gevonnis. Sy is vroeër vanjaar skuldig bevind op drie aanklagte van bedrog en een van sameswering om bedrog te pleeg.
Regter Edward Davila het egter beveel dat Holmes, wat tans swanger is, eers in April volgende jaar moet aanmeld om die vonnis uit te dien.
Die aanklaer Stephanie Hinds het die vonnis verwelkom en gesê dit “weerspieël die vermetelheid van haar massiewe bedrog en die verbysterende skade wat sy aangerig het”.
“Byna ʼn dekade lank het Elizabeth Holmes uitgebreide valshede gefabriseer en versprei om talle kapitaalbeleggers, groot sowel as klein, te lok. Haar bedrieglike stories het tot die verlies van miljoene dollar gelei.”
Holmes het destyds beleggers oortuig dat sy ʼn revolusionêre mediese toestel ontwikkel het en het sodoende sowat $700 miljoen ingevorder.
Oomblikke voor haar vonnisoplegging het ʼn huilende Holmes aan die hof gesê dat sy volle verantwoordelikheid aanvaar vir Theranos.
“Ek is verpletter deur my tekortkominge. Ek het elke dag vir die afgelope paar jaar soveel pyn beleef vir dit waardeur mense gegaan het omdat ek hulle in die steek gelaat het.
“Ek het alles gegee wat ek gehad het om die maatskappy te bou en te probeer red.”
Nadat Holmes haar vonnis gehoor het, het sy haar ma, Noel, en haar lewensmaat, Billy Evans, wat ook die pa is van haar 15 maande oue seun, gedruk.
Holmes se prokureur het aangedui dat sy teen haar skuldigbevinding sal appelleer.
Aanklaers wil nou hê Holmes moet $800 miljoen in restitusie betaal aan beleggers, waaronder die Walton-familie van Walmart, die Walgreens-apteekketting en die mediamagnaat Rupert Murdoch.
ʼn Restitusieverhoor sal geskeduleer word, hoewel Holmes sê sy nie geld het om daardie bedrag te betaal nie.
