Video: ‘Skaakmat’ toe robot seun se vinger breek

In die video kan gesien word hoe die seun ŉ skaakstuk optel om te skuif en die robot hom dan vir etlike sekondes aan die vinger gryp (Foto: Skermskoot)

Diegene wat gedink het skaak is veilig, sal verbaas wees om te hoor dat hierdie sport ook soms sy beserings oplewer.

Dit het die skaakgemeenskap aan die gons gehad toe ŉ skaakrobot verlede week ŉ sewejarige seun se vinger tydens ŉ wedstryd by die Moskou-skaakfederasie in Rusland gebreek het.

CNN en The Guardian berig die seun het na die robot se mening té vinnig ŉ skuif gemaak, waarna hy die seun aan die vinger gegryp het. Die robot het glo nog nie sy skuif afgehandel nie.

Volgens Sergey Lazarev, president van die Moskou-skaakfederasie, moet die robot genoeg tyd hê om sy skuif te maak. “Die seun het te haastig probeer skuif en die robot het hom toe aan sy vinger gegryp,” het Lazarev gesê.

ŉ Video van die voorval is op sosiale media gedeel en daarin kan gesien word hoe die seun ŉ skaakstuk optel om te skuif en die robot hom dan vir etlike sekondes aan die vinger gryp. Die video wys hoe drie mense hulle na die kind haas om hom te help.

Volgens Lazarev het die seun die volgende dag weer gespeel en die toernooi met ŉ vingerstut voltooi. Die seun is een van die 30 beste skaakspelers in die o.9-groep in Rusland.

Sky News berig die federasie het die robot gehuur en word al vir ŉ geruime tyd op baie plekke deur spesialiste uitgestal. Dit is glo ook die eerste keer dat ŉ voorval van só ŉ aard tydens ŉ skaakwedstryd aangemeld is.

Sergey Smagin, visepresident van die Russiese Skaakfederasie, sê die seun het die veiligheidsmaatreëls oortree. Dit is nie duidelik of enige veiligheidsopdragte aan die seun uitgereik is voordat sy spel teen die robot begin het nie.

“Toe die seun sy skuif maak, het hy nie besef hy moet eers vir die robot wag nie,” het Smagin gesê. “Dit is ŉ uiters seldsame geval, die eerste waarvan ek weet.”

Lazarev sê die robotoperateurs moet dalk oor hul “skepping” herbesin. “Die nodige veranderinge moet gemaak word om die robot veiliger te maak vir sy mededingers,” sê hy.