Soorte resepte:

[Resep] Bobotie

Bobotie (Foto: Lapa- Uitgewers)

Bobotie het die manier om jou terug te vat huis toe. Blatjang, appelkooskonfyt en rosyntjies; kan jy dit al proe?

6-8 porsies

Bestanddele:

  • 1 sny witbrood
  • 45 ml (3e) blatjang
  • 250 ml (1 k) Clover-volroommelk
  • 60 ml (4 e) Clover Krush-mango-en-perskesap
  • Clover Mooi River-botter
  • 1 ui, fyngekap
  • 10 ml (2t) matige kerriepoeier
  • 1 kg beesmaalvleis
  • 10 ml (2t) borrie
  • 125 ml (½ k) pitlose rosyntjies
  • 5 ml (1 t) sout
  • 15 ml (1 e) appelkooskonfyt
  • 3 eiers
  • 2 lourierblare

Metode:

  1. Voorverhit die oond tot 180 °C en smeer ʼn oondbak van 30 x 20 cm met botter.
  2. Week die brood in 125 ml (½ k) van die melk. Hou die oorblywende 125 ml (½ k) melk eenkant.
  3. Smelt botter in ʼn kastrol en braai die ui tot sag.
  4. Voeg die maalvleis by. Roerbraai die maalvleis tot dit verkleur het en daar nie meer klonte is nie.
  5. Roer die res van die bestanddele, behalwe die oorblywende melk, eiers en lourierblare, by die maalvleismengsel. Verwyder die kastrol van die hitte.
  6. Druk die melk uit die geweekte brood. Roer die brood by die maalvleismengsel tot goed gemeng. Skep die maalvleismengsel in die voorbereide oondbak.
  7. Klits die oorblywende melk en eiers met ʼn vurk tot gemeng en giet dit bo-oor die maalvleismengsel.
  8. Druk die lourierblare in die vleismengsel en bak dit 50 minute of tot gestol in die middel.
  9. Sit dit warm voor saam met geelrys.

Bron: Gunsteling Suid-Afrikaanse kos

Uitgewer: Lapa

Net soos ʼn pannekoek met die beste resep nog steeds kan flop, kan Maroela nie pa (of ma!) staan vir enige van die resepte wat jy self by die huis probeer nie. Elke koppie meel, bakpoeier, melk, eier of enige ander bestanddeel is dus in jou eie hande en Maroela Media kan nie enige verantwoordelikheid aanvaar vir komplimente (of klagtes) oor jou kookvernuf nie. -Red

Deel van: Koolstoof

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.