Soorte resepte:

[Resep] Maklikste viskoekies

Maklikste viskoekies (Foto: Verskaf)

Soms is dit die eenvoudigste bestanddele wat die lekkerste ete word. My gesin is dol oor hierdie maklike viskoekies en ek maak sommer uit die staanspoor ʼn dubbele mengsel, sodat daar vir die volgende dag se kosblikke ook iets gereed is. Ons eet dit graag met mielies aan die stronk of klein aartappeltjies in die skil en ’n lekker groot slaai – koningskos!

Met vol skedules en besige dae is ons almal op soek na resepte wat vinnig, bekostigbaar en maklik is om te maak. As dit boonop ’n gesinsgunsteling word, is dit ’n ekstra bonus. ’n Blikkie vis kan met hierdie resep vinnig in ’n heerlike ete omtower word en dis ’n ideale manier om iewers in die week ook vis te eet, want dis regtig gesond. Sardyne is ’n uitstekende bron van proteïen en boonop is die sagte graatjies baie ryk aan kalsium en druk maklik fyn. Sowel sardyne as sardientjies is van die olierige tipes vis en dus ryk aan gesonde omega 3-vette. Nog meer rede om dit gereeld in ons etes in te sluit. Jy weet mos jou ma het altyd gesê: vis maak jou slim. Nou weet jy hoekom.

Resep aangepas uit Cooking from the heart 1

Lewer 25 koekies

Bestanddele

  • 1 x 400 g-blik sardyne in tamatiesous
  • 2 wortels, grofgerasper
  • 60 ml (¼ k) steengemaalde volkoringmeel
  • 2 Nulaid- groot eiers, geklits
  • 125 ml (½ k) rou hawermout
  • 60 ml (¼ k) blatjang of tamatiesous
  • 60 ml (¼ k) gekapte vars kruie, soos Italiaanse pietersielie en koljander
  • 5 ml (1 t) gemaalde koljander
  • 15 ml (1 e) suurlemoensap
  • 2,5 ml (½ t) sout
  • swartpeper na smaak
  • 15-30 ml (1-2 e) olyf- of avokado-olie vir braai

Metode

  1. Plaas die vis met die sous in die blik in ’n groot mengbak en druk dit fyner met ’n vurk.
  2. Roer die res van die bestanddele, behalwe die olie, by en meng goed deur. Die beslag is redelik loperig. Geur na smaak.
  3. Verhit ’n dun lagie olie oor matige hitte in ’n braaipan (’n AMC 28 cm Chef’s Pan werk uitstekend). Skep lepelsvol van die mengsel in die pan en braai vir 3-5 minute tot goudbruin aan die onderkant en effens gestol bo-op. Draai om en braai nog ’n paar minute of tot goudbruin en gaar.
  4. Dreineer op kombuispapier en herhaal met die res van die mengsel en nog olie, soos benodig. Hou die viskoekies warm.
  5. Sit vir aandete met slaai en groente van jou keuse voor. Of laat heeltemal afkoel en hou dit vir kosblikke.

Wenk

  1. Gebruik sardientjies, in plaas van sardyne, as julle lief is daarvoor. Gebruik dieselfde hoeveelheid vis (sowat 3 x 120 g-blikkies) met die vloeistof. As die mengsel te droog is, voeg nog ’n eier of ’n bietjie water by.

Net soos ʼn pannekoek met die beste resep nog steeds kan flop, kan Maroela nie pa (of ma!) staan vir enige van die resepte wat jy self by die huis probeer nie. Elke koppie meel, bakpoeier, melk, eier of enige ander bestanddeel is dus in jou eie hande en Maroela Media kan nie enige verantwoordelikheid aanvaar vir komplimente (of klagtes) oor jou kookvernuf nie. -Red

Deel van: Bykosse, Só maak mens, Vleis en seekos

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

11 Kommentare

E.K. ·

Ai toggie, “steengemaalde volkoringmeel”? Ons is twee ek hou nie sulke in my huis en kan nie sulker bestanddele net vir nou en dan koop nie. Wat anders kan mens koop/gebruik in die plek van dit?

Patrys ·

Ek is seker jy kan gewone meel insit. Dis om dit te bind. So enige meel sal werk. Ek gebruik hawersemels ipv meel – maar jy sal dit ook nie sommer net aanhou in jou huis as jy dit nie gereeld gebruik nie. So enige meel sou ek sê

E.K. ·

..en dan nog vingerfoute ook. SULKE nie sulker en “bestanddele ook uitgelaat – vinges vinniger as brein of so-iets

E.K. ·

aaarg “vingers” nei vinges. Ek gee op, dis nie my dag nie!

JL ·

Hi E.K jy kan bruismeel gebruik werk net so goed. Pas die resep aan met wat jy het. Ek gebruik ook oorskiet rys ipv havemout.

HM ·

Jy kan beslis gewone meel ook gebruik, beide koekmeel of volkoringmeel sal werk. Selfs die rysmiddel in bruismeel sal nie ‘n verskil maak nie. Geniet die resep.

A ·

Ok, wat is die verskil tussen sardientjies en sardyne by die wenk?

karin ·

Sardyne is ‘pilchards’ en sardientjies is ‘sardines’ (die lekker klein duretjies!)

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.