Die F1-kalenderjaar is veronderstel om op 21 Maart in Melbourne af te skop. Maar strenger Covid-19-regulasies in Australië beteken dat die wedren moontlik tot ’n latere datum uitgestel kan word.
Melbourne skud juis sy vere reg om sy eerste groot internasionale sportgebeurtenis in maande aan te bied met die Australiese tennis-ope wat in Februarie plaasvind, maar die plaaslike Victoria-regering het aangedui dat spelers vir 14 dae in kwarantyn moet wees.
Indien dieselfde regulasies in Maart vir die F1-wedren geld, kan dit die voorbereidingstyd van die renjaers en hul spanne in die wiele ry. Bahrein sal dan die eerste wedren van die jaar op 28 Maart aanbied.
Die F1-base het verlede jaar ’n voorlopige kalender vir die 2021-wedrenjaar bekendgestel en altesaam 23 wedrenne word beplan.
“Soos ons vroeër reeds gesê het, verwag ons dat toeskouers vir die 2021-seisoen sal terugkeer en ondersteuners kan na ’n kalender soortgelyk aan die oorspronklike beplanning vir 2020 uitsien,” het F1 destyds in ’n amptelike verklaring gesê.
Volgens Chase Carey, F1-voorsitter, het 2020 se wedrenne gewys dat sport suksesvol in die Covid-19-era aangebied kan word.
“Baie van die gasheerstede gebruik die wedrenne as ’n platform om vir die wêreld te wys dat hulle vorentoe kan beweeg en die virus kan bestuur,” het Carey gesê.
- Die voorlopige F1-kalender vir 2021:
21 Maart: Australië
28 Maart: Bahrein
11 April: China
25 April: Moet nog bevestig word
9 Mei: Spanje
23 Mei: Monaco
6 Junie: Azerbeidjan
13 Junie: Kanada
27 Junie: Frankryk
4 Julie: Oostenryk
18 Julie: Verenigde Koninkryk
1 Augustus: Hongarye
29 Augustus: België
5 September: Nederland
12 September: Italië
26 September: Rusland
3 Oktober: Singapoer
10 Oktober: Japan
24 Oktober: VSA
31 Oktober: Mexiko
14 November: Brasilië
28 November: Saoedi-Arabië
5 Desember: Abu Dhabi