(Foto verskaf deur SPAR)
Jamaika het vandag veral die krane in die vierde kwart oopgedraai om Nieu-Seeland met 59–48 in ʼn aksiebelaaide Wêreldbeker-wedstryd in Kaapstad te oorrompel.
Jhaniele Fowler en haar spanmaats het sodoende ʼn uitspeelstryd-reddingsboei in Suid-Afrika se rigting gegooi; nou moet die Proteas net later vanmiddag ordentlik met Uganda afreken om hul podiumdroom aan die gang te hou.
Maar terug na Nieu-Seeland.
Nadat die verdedigende kampioen Woensdagaand gelykop teen die Proteas gespeel het, het hulle nou vir die eerste keer die onderspit teen Jamaika in ʼn Wêreldbeker-wedstryd gedelf.
“Dit is ʼn bitter pil om te sluk en ons sal beslis ʼn bietjie selfondersoek moet doen,” het Ameliaranne Ekenasio, kaptein van die Silwer Varings, ná afloop van die kragmeting gesê.
“Al wat ons nou kan doen, is om saam te staan; ons land en ondersteuners verdien beter van ons op die baan.”
An outstanding fourth quarter ????@NetballJamaica are impressing as they edge towards a first ever Netball World Cup victory over New Zealand ????????#NWC2023 | #PutYourHandsUp pic.twitter.com/KzFkhVVfmr
— World Netball (@WorldNetball_) August 3, 2023
Fowler was nou veral ʼn kolos onder die doelpaal en die Kiwi-verdedigers was magteloos om haar te stuit. Die speler, wat 1,98 m in haar sokkies staan, was in ʼn stadium in die kol met al 49 van haar doelpogings.
Indien Suid-Afrika later vandag met Uganda afreken, sal doelverskil bepaal watter span na die bekeruitspeelrondes deurdring.
- Die Proteas speel om 16:00 teen Uganda.
Telling ná elke kwart:
Eerste kwart: 15–11 in Jamaika se guns
Tweede kwart: 26–23 in Jamaika se guns
Derde kwart: 41–39 in Jamaika se guns
Vierde kwart: 59–48 in Jamaika se guns.
The Sunshine Girls condemned New Zealand to their biggest-ever loss at the Netball World Cup with goal shooter Jhaniele Fowler scoring 49 goals from 49 attempts ???????????? #HereForHer | #NWC2023 pic.twitter.com/87gISjAqzr
— SuperSport ???? (@SuperSportTV) August 3, 2023
