Woensdagaand se gelykop uitslag teen die Silwer Varings het gewys dat die Proteas nie net met die bestes in die wêreld kan saamgesels nie, maar ook oor die potensiaal beskik om met die topspanne af te reken.
Suid-Afrika se skitterende verdedigers het ʼn paar keer omgekeerde balbesit teen die Nieu-Seelanders bewerkstellig en beter afrondingswerk kon dalk vir selfs groter glimlagte gesorg het.
Tog verdien ʼn gelykop uitslag teen gedugte teenstanders ná ʼn uitstekende terugvegpoging beslis ʼn groot klop op die skouer.
Nodeloos om te sê is afrigter Norma Plummer trots op haar span en sy het veral die jonger spelers uitgesonder. Nichole Taljaard het onder meer gewys dat sy sterk in ʼn drukkokersituasie kan staan toe sy in die kol met ʼn baie belangrike doel net vóór die einde van die wedstryd was.
“Die jonger spelers het veral hul teenwoordigheid op die baan laat geld. Kyk net na Nichole – sy is vir die tweede keer op ʼn streep as die speler van die wedstryd aangewys. Hulle pluk die vrugte van hul harde werk,” het Plummer gesê.
Om ʼn tweede plek in die groep te verseker sal die Proteas nie net later vandag ordentlik met Uganda moet afreken nie, maar hulle sal ook duim vashou dat Jamaika pakslae teen die Kiwi’s uitdeel.
Danksy Jhaniele Fowler se vaardighede spog Jamaika met die meeste doele in Groep G van die toernooi, terwyl die Kiwi’s weer die minste doele in die groep afgestaan het.
Groep G-punteleer:
- Jamaika: 8 punte
- Nieu-Seeland: 7 punte
- Suid-Afrika: 5 punte
- Uganda: 4 punte
- Wallis: geen punte
- Trinidad en Tobago: geen punte
Uitslae:
Sri Lanka 60 – 56 Barbados
Suid-Afrika 48 – 48 Nieu-Seeland
Jamaika 89 – 26 Trinidad en Tobago
Uganda 73 – 56 Wallis
Zimbabwe 68 – 40 Singapoer
Vandag se bepalings:
09:00: Australië teen Engeland en Wallis teen Trinidad en Tobago
11:00: Jamaika teen Nieu-Seeland en Fidji teen Skotland
16:00: Suid-Afrika teen Uganda
18:00: Tonga teen Malawi.