Liplek-lekker drama op Hockenheim toe Verstappen wen

Max Verstappen op die podium na hy die Duitse Formule Een-Grand Prix gewen het. Foto: (AP Photo/Jens Meyer)

Maande lank, sommige sê jare lank, het Formule Een-ondersteuners na ʼn driedubbele dosis drama, chaos en opwinding uitgesien.

En toe kry hulle Sondagmiddag op Hockenheim ʼn kersie op die koek toe die jong Nederlander Max Verstappen (Red Bull) die chaotiese Duitse Formule Een- Grand Prix in ʼn tyd van 01:44:31.275 gewen het.

Verstappen is gevolg deur Sebastian Vettel (Ferrari) wat in die 20ste wegspringposisie weggespring en sy weg oopgevleg het, Daniil Kvyat (Toro Rosso), wat 14de weggespring het, Lance Stroll (Racing Point), Carlos Sainz (McLaren) en Alex Albon (Toro Rosso).

Die ren het alles bevat: hoogdrama, ongelukke, goeie jaagwerk, verkeerde besluite, voete van klei.

Dit was net die regte medisyne om nuwe lewe in vanjaar se reeks te blaas en Mercedes se oorheersing effe in die bek te ruk.

Verstappen steek die wenstreep oor. Foto: (Epa pool photo Via AP/Suki Sulejmanovic)

Dit was ʼn nagmerriedag vir die Mercedes-renspan, een wat hulle beslis nie sal wil onthou nie, veral omdat dit boonop die 200ste ren was waarby die span betrokke was.

Die huidige wêreldkampioen, Lewis Hamilton, het drie keer van die baan af getol, ʼn ongeluk gemaak en is boonop beboet. Hy kon slegs 11de eindig.

Veel erger nog was die ongeluk wat Valtteri Bottas se drome beëindig het. Bottas was ongedeerd in die afgelope 22 renne, maar Sondag het dit tot ʼn einde gekom.

Breek ʼn lansie vir Albon, wat ná die ren gesê dat dit die eerste keer was dat hy in Formule Een op ʼn nat baan gejaag het en glad nie geweet het wat om te verwag nie.

Daniil Kvyat spuit Verstappen met sjampanje. Foto: (AP Photo/Jens Meyer)

Dalk was dit die regte uitgangspunt, want Hockenheim het soos ʼn slagveld in die reën en op die nat baan gelyk.

Ferrari se Charles Leclerc was ook in ʼn ongeluk betrokke, asook Nico Hülkenberg en Sergio Pérez.

Daar was ook ʼn lang lys van ander ongevalle, tussendeur die veiligheidsmotor wat vier keer ontplooi is.

Kyk ook ʼn bietjie hierna: Kevin Magnussen het ses keer in die kuipe aangedoen, Hamilton vyf keer, asook Verstappen, Vettel, Stroll, Romaoin Grosjewan, Robert Kubica en George Russell. Dit het alles tot die spanning bygedra.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

12 Kommentare

jongste oudste gewildste
koos

En weereens dubbel standaarde. Hamilton kry 5 sekondes straf omdat hy aan die verkeerde kant van ‘n merker by die kuipe inry. Leclerc en Ferrari kry ‘n boete in geld waarde vir ‘n onveilige wegtrek uit die kuipe. ‘n Aksie wat lewens in gevaar stel. In vorige renne het het bestuurders tyd boetes gekry vir die aksies. Weereens is dit vir my bewys dat Ferrari anders behandel word as die res van die spanne.

Cuda

Die ren se toestande was ‘n groot gelykmaker. Jammer dat weer ‘n ren se lot bepaal wat tenminste onvoorspelbaar is. Merc se dominansie vir so lank beslis nie goed vir die sport nie. Koos, eks nie seker wie jy ondersteun nie. My gevoel weer is dat Merc baie besluite in hulle guns ontvang. Ook is die mense wat oortredings beoordeel, glad nie konsikwent nie.

Schalk

Cuda ek stem saam die onvoorspelbare uitslag was goed vir die sport. Duidelik die ander kleiner spanne ‘n kans gegee om ook te kompeteer. Koos hoe anders sou jy die Ferrari span wou beboet sonder om die drywer wat in die geval onskuldig is te benadeel?
Verseker is die FIA se panel onkonsekwent met hulle boetes en besluite.
Net ‘n vragie , wat van Hamilton se hangende ondersoek na hy blykbaar stadiger gery het agter die veiligheidsmotor as nodig?

Pieter

Uiteindelik is LH se vlerke bietjie geknip. Hy is die grootste klaagkous wat ek al ooit gesien het. Kamtig is sy keeltjie seer, maar hy is die een wat die meeste op sy radio is en oor alles kla. Hy is soos ‘n ou vrou met ‘n nat broek. Mercedes word SO bevoordeel met besluite wat hul kant toe gaan by amper elke wedren.

koos

Julle verstaan my verkeerd. Dit gaan oor die feit dat as sekere beamptes moet straf uitdeel word sekere spanne bevoordeel. Gister was dit Ferrari, 2 weke terug Mercedes en so kan ons aangaan. Ecelstone het begin met sy voortrekkery van Ferrari en vandag kan die sport nie daarvan loskom nie. Die hele sport het ‘n nuwe baadjie nodig, dat almal gelyk is en gelyk kan meeding. O ja, ek ondersteun nie ‘n sekere bestuurder nie, maar wel ‘n span as geheel, ongeag wie die motors bestuur.