Griekeland se Stefanos Tsitsipas het met ’n paar ongelooflike houe teen Jannik Sinner vorendaggekom. Foto: Aaron Francis/AFP.
Die Griek Stefanos Tsitsipas speel vanmiddag vir die eerste keer in ʼn eindstryd van ʼn toernooi sedert verlede jaar se Franse Ope.
Hy het in die halfeindstryd van die Rotterdam-toernooi teruggeveg nadat hy die eerste stel teen die Tsjeggiese kwalifiseerder Jiri Lehecka verloor het. Tsitsipas, die topgekeurde vir die toernooi, het eindelik met 4-6, 6-4 en 6-2 gewen.
Hy kom nou in die eindstryd teen die derde gekeurde Kanadees, Felix Auger-Aliassime, te staan. Hulle het reeds sewe keer teen mekaar gespeel en Tsitsipas loop met 5-2 voor.
Auger-Aliassime het die tweede gekeurde verdedigende kampioen, Andrey Rublev, met 6-7 (5/7), 6-4 en 6-2 geklop. Die Kanadees het 41 wenhoue geslaan, waarvan 11 kishoue was. Die 21-jarige Auger-Aliassime droom steeds van ʼn eerste titel op die ATP-toer. Hy het al in agt eindstryde gespeel, maar was in almal aan die verloorkant.
By die St. Petersburg-vrouetoernooi speel die eerste gekeurde Griek, Maria Sakkari, teen die tweede gekeurde Anett Kontaveit van Estonië in die eindstryd vanmiddag.
Sakkari het in die halfeindstryd vir Irina-Camelia Begu van Roemenië met 6-4, 6-7 (4/7) en 6-4 geklop. Kontaveit het makliker met 6-3 en 6-4 met die sewende gekeurde Jeļena Ostapenko van Letland afgereken.
