Die Suid-Afrikaner Bryce Easton (-10) het ʼn teleurstellende derde ronde by die Majorka-ope in Spanje gespeel.
Ná sy eerste twee rondes van onderskeidelik 63 en 67, het hy die derde ronde in 70 houe, gelyk aan baansyfer voltooi. Hy is nou in die gesamentlike sesde plek, vyf houe agter die voorloper Jeff Winther (-15) van Denemarke. Winther is twee houe voor Jorge Campillo (-13) van Spanje.
Terwyl spelers soos Winther gister die voëltjies ingeryg het in sy ronde van 62 houe, kon Easton net twee voëltjies aanteken, maar dis ongedaan gemaak deur twee brouhoue.
Easton se landgenoot, Zander Lombard (-6), is in die gesamentlike 14de plek.
Op die Amerikaanse PGA-toer het die Suid-Afrikaner Branden Grace (-5) in die gesamentlike sewende plek klaargemaak. Hideki Matsuyama (-15) het met ʼn arend op die laaste putjie gesorg dat die tuisskare breed glimlag by die Zozo-kampioenskap in Chiba, Japan. Hy het die toernooi in sy geboorteland met vyf houe gewen.
Die Amerikaners Brendan Steele en Cameron Tringale was gesamentlik in die tweede plek.