Dit lyk tans of spanne hul storie sal moet ken om die Durban’s Super Giants in die SA20-toernooi te klop.
Danksy die flitsende kolwe van Matthew Breetzke, Quinton de Kock, JJ Smuts en Heinrich Klaasen spog hulle met meer as genoeg wilgerlatplofkrag, terwyl Reece Topley, Noor Ahmad en Keshav Maharaj gereeld paaltjies laat kantel.
Die Durbaniete het die Paarl Royals met 125 lopies op Kingsmead oorrompel met die einste Breetzke en Klaasen se kanonkolwe wat die praatwerk gedoen het.
Breetzke het die bal aan die rol gesit met sy blitsige 78 lopies, waarna Klaasen vir die afrondingswerk met ʼn supersoniese vyftigtal van slegs 17 aflewerings gedoen het.
Absolute carnage from Matty ???????? pic.twitter.com/2LjNovWCY6
— Durban's Super Giants (@DurbansSG) January 28, 2024
Die 32-jarige Klaasen is ongetwyfeld een van die gevaarlikste witbalkrieketspelers – nie net in Suid-Afrika nie, maar ook op die internasionale verhoog.
Hy slaan sy 280 SA20-lopies teen ʼn gemiddeld van amper 47 en ʼn ongelooflike treftempo van 207,40.
Dan maak Ahmad dinge moeilike vir enige kolwer; ongeag of jy in die toporde speel of ʼn stertkantkolwer is.
Die Afghaanse draaier het ʼn paar weke gelede sy 19de verjaardag gevier sy goëlaflewerings beteken dat hy steeds paaltjies as verjaardaggeskenke kry.
Hy spog met ʼn uitstekende boulontleding van 5/11 teen die Royals en hy het reeds 83 paaltjies in sy jong T20-loopbaan geneem.
Houston, we’ve got an alien in our midst ???? pic.twitter.com/2fu0gHHVgd
— Durban's Super Giants (@DurbansSG) January 28, 2024
- Opsomming van die telkaart:
Durban’s Super Giants 208/7 in 20 boulbeurte: Matthew Breetzke 78, Heinrich Klaasen 50* en Tabraiz Shamsi 2/20.
Paarl Royals 83/10 in 13,2 boulbeurte: Mitchell van Buuren 36*, Noor Ahmad 5/11 en Keshav Maharaj 2/23.
- Punteleer:
- Durban’s Super Giants: 28 punte ná agt wedstryde
- Paarl Royals: 22 punte ná agt wedstryde
- Sunrisers Eastern Cape: 19 punte ná sewe wedstryde
- Pretoria Capitals: 10 punte ná sewe wedstryde
- MI Cape Town: 9 punte ná sewe wedstryde
- Joburg Super Kings: 8 punte ná sewe wedstryde
Johann Gresse ek geniet joy berig net soveel as die krieket self! Wilgerlatplofkrag – man, wat ‘n lekker beskrywende woord om die kolwers se slaanwerk te beskryf!