Suid-Afrika is ongetwyfeld ʼn krag waarmee daar in Dubai rekening gehou moet word. Die Blitsbokke is deur na nóg ʼn bekereindstryd in die woestynstad nadat die span vir Fidji met 14 – 7 in die halfeindstryd geklop het.
Die eilandmanne het vroeg in die wedstryd hul fisieke teenwoordigheid laat geld, maar die Suid-Afrikaners het sterk gestaan en Justin Geduld se opportunistiese werk ná ʼn vinnige tikskoppie het vir die eerste punte van die wedstryd gesorg.
Suid-Afrika het ʼn rustydvoorsprong van 7 – 0 geniet, maar ʼn mens kan nooit vir Fidji op ʼn sewesrugbyveld enige spasie gun nie en Pilipo Bukayaro het vroeg in die tweede helfte met ʼn goeie drie teruggeslaan.
Tog is dit duidelik dat dié Blitsbokspan vir mekaar speel.
Hulle het kliphard verdedig en elke speler het na ʼn gaping gesoek om sy spanmaat weg te stuur; daar was gʼn teken van ʼn soektog na persoonlike glorie nie.
Masande Mtshali het die wendrie laat in die wedstryd gedruk.
Die Blitsbokke speel later vanmiddag teen Argentinië in die bekereindstryd.
Die Suid-Amerikaners het pas hul aksiebelaaide halfeindstryd teen Nieu-Seeland met 21 – 19 beklink.
Die bekereindstryd word om 17:53 beslis.
- Puntemakers:
Suid-Afrika: Drieë: Justin Geduld en Masande Mtshali.
Fidji: Drie: Pilipo Bukayaro.
The @Blitzboks hold on and storm into the final ????????
Can they make it 5 straight title at #HSBCSVNSDXB? ????#HSBCSVNS pic.twitter.com/tmtBGTsMjl
— HSBC SVNS (@SVNSSeries) December 3, 2023
- Uitslae van Blitsbokke se vorige bekerwensessies in Dubai:
2003: 33 – 26 teen Nieu-Seeland
2006: 31 – 12 teen Nieu-Seeland
2008: 19 – 12 teen Engeland
2014: 33 – 7 teen Australië
2016: 26 – 14 teen Fidji
2017: 24 – 12 teen Nieu-Seeland
2019: 15 – 0 teen Nieu-Seeland
2021: 42 – 7 teen die VSA
2021: 10 – 7 teen Australië
2022: 21 – 5 teen Ierland