Vergeet vir eers van druk. Vir die Blitsbokke is dit ʼn voorreg om in die Kaap te speel.
Die Blitsbokke het laas in 2015 die sewessilwerware in Kaapstad omhoog gehou, maar die span is oorgehaal om op verlede naweek se sukses in Dubai voort te bou.
“Ons is mal daaroor om voor ons ondersteuners, familie en vriende te speel en die Kaapstad-toernooi is ons enigste geleentheid om dit te doen,” het Justin Geduld gesê.
Volgens Zain Davids het die Blitsbokke weer hul wenvuur tussen die duine van Dubai gevind en die span is vasbeslote om weer op die DHL-stadion te skitter.
“Baie dinge het vir ons in Dubai reg geloop. Ons het as ʼn hegte eenheid gespeel en besef dat ons goed genoeg voorberei het om te wen. Nou moet ons dit weer aan onsself op die speelveld bewys,” het Davids gesê.
“Om in Kaapstad te speel is ʼn voorreg. Ons skuld ons ondersteuners ʼn vertoning waarop hulle trots kan wees.”
Suid-Afrika is saam met Groot-Brittanje, die VSA en Ierland in ʼn groep en hulle speel Saterdag om 10:50 in hul eerste groepwedstryd teen die Britte.
Blitsbok-bepalings (Saterdag):
10:50: Suid-Afrika teen Groot-Brittanje
14:12: Suid-Afrika teen VSA
19:34: Suid-Afrika teen Ierland
Punteleer:
- Suid-Afrika: 20 punte
- Argentinië: 18 punte
- Nieu-Seeland: 16 punte
- Fidji: 14 punte
- Ierland: 12 punte
- Samoa: 10 punte
- Australië: 8 punte
- VSA: 6 punte
- Frankryk: 4 punte
- Groot-Brittanje: 3 punte
- Spanje: 2 punte
- Kanada: 1 punt.