Dan du Plessis is gereed vir aksie en is vasberade om ʼn verskil in sy Stormers-trui te maak.
ʼn Besering het die 28-jarige senter vir ʼn ruk langs die veld gehou, maar hy het 60 minute in die Kapenaars se onlangse Verenigde Rugbykampioenskap-triomf van 16 – 15 teen die Sharks gespeel.
“Dit was baie lekker om weer terug op die veld te wees – ek moes vir net ʼn rapsie minder as drie maande dinge van die kantlyn dophou. Boonop was dit ook ʼn taai wedstryd teen die Sharks – hulle is nie ʼn span wat van fisieke spel wegskram nie,” het Du Plessis gesê.
Die oudleerder van Paul Roos Gimnasium se goeie spel in die middeveld was een van die sleutels tot die Stormers se sukses in die eerste twee weergawes van die Verenigde Rugbykampioenskap.
Toegegee, die span het aanvanklik die wind van voor in sy jongste Europese rugby‑avontuur gekry, maar dinge is weer op koers ná oorwinnings teen La Rochelle en die Bulls.
Die Kapenaars speel weer Saterdag teen die Sale Sharks in ʼn Kampioenbeker-kragmeting op die DHL-stadion.
En Du Plessis verwag nog ʼn vurige tweestryd.
“As jy nie Sale se groot voorspelers in toom hou nie, kan hulle binne ʼn japtrap voorvoetmomentum geniet. Tog is dit juis húlle teen wie jy wil speel – jy wil jouself teen die bestes meet.”
Daarbenewens is daar ook ʼn rits Suid-Afrikaners (onder wie Robert du Preez en Ernst van Rhyn) in die Sale-groep.
“Dit gaan interessant wees om teen ouens kragte te meet wat vantevore hul rugby in Kaapstad gespeel het. Hulle het kennis van die Stormers se rugby-DNS, maar ons is opgewonde oor die kragmeting.”
Die wedstryd begin Saterdag om 19:30 en die aksie word regstreeks op SuperSport uitgesaai.
Our last Summer Sundowner and last game at DHL Stadium until March. Sale Sharks are bringing some old friends around on Saturday night.
????️ Tickets here https://t.co/s5IWVth9wh#iamastormer #dhldelivers pic.twitter.com/XkUyvmH6w6
— DHL Stormers (@THESTORMERS) January 8, 2024
- Die spanne se jongste uitslae:
Stormers:
31 – 7 teen Zebre
26 – 35 teen Leicester Tigers
21 – 20 teen La Rochelle
26 – 20 teen die Bulls
16 – 15 teen die Sharks
Sale Sharks:
54 – 12 teen die Newcastle Falcons
21 – 13 teen Leicester Tigers
25 – 35 teen Saracens
28 – 5 teen Stade Français
27 – 37 teen Leinster.