Ierland se rugbyselfvertrouebeker is tans tot oorlopens toe vol nadat hy vir Frankryk met 38 – 17 op die Stade Velodrome in Marseille oorrompel het.
Andy Farrell se spelers het vyf drieë teenoor die twee van die tuisspan gedruk en hulle het ook minder hanteerfoute (nege teen 14) gemaak, terwyl hulle ook gereeld omgekeerde balbesit bewerkstelling het.
Ierland se oorheersing het ook ʼn hupstoot in die eerste helfte gekry toe Frankryk se Suid-Afrikaans gebore slot, Paul Willemse, met ʼn rooi kaart van die veld gestuur is.
Munster se Tadhg Beirne het tot Ierland se driedrukpartytjie bygedra en hy kon kwalik sy oë glo toe hy die eindtelling sien.
“Om Frankryk met só ʼn telling te klop is baie onverwags. Jy staal jouself vooraf vir ʼn taai wedstryd; dalk het die rooi kaart dinge vir ons makliker gemaak, wie weet?
Volgens die slot het Ierse rugbyspelers ʼn onwrikbare geloof in hul vermoëns op die speelveld.
“Tog het ons ook geweet dat ons glad nie vir Frankryk hoef terug te staan nie – veral as ʼn mens na ons vaardighede en ons benadering tot die spel kyk. Dit is ʼn groot voorreg om saam met die groep te speel; ons is mal oor wat ons doen.”
???? Aki ???? Gibson-Park
The defending champions with the opening try of the Championship ????#GuinnessM6N #FRAIRE @IrishRugby pic.twitter.com/10jOc3wwZT
— Guinness Men's Six Nations (@SixNationsRugby) February 2, 2024
Galthié meen daar is nog petrol in Frankryk se rugbytenk
Ondanks die nederlaag – dit is die grootste sedert hy in 2019 Frankryk se afrigtersleisels vasgevat het – meen Fabien Galthié dat die Hane nie hul kraai kwyt is nie.
“Om die openingswedstryd van die Sesnasies te verloor is nooit iets positief nie en ons sal daarmee moet saamleef. Ja, dit is moeilik, maar die toernooi staan nie stil nie. Daar wag nog vier wedstryde op ons en Skotland is volgende,” het Frankryk se hoofafrigter gesê.
Hy het wel oor Frankryk se gesukkel op die aanval gekla.
“Ons kan almal saamstem dat ons nie op ons beste was nie – ons het balbesit weggegee, ons was stadig en ons hantering was vrot. Ons het vooraf vir mekaar gesê om die spel vinnig te maak, maar om met 14 spelers teen Ierland te speel het ook nie veel gehelp nie.”
⌚️ Dan Sheehan crashed over the line in plenty of time for Ireland to pick up the bonus point try out in Marseille in the opening round of the Championship ????#Breitling #DefiningMoment @Breitling pic.twitter.com/EwDQECkyTM
— Guinness Men's Six Nations (@SixNationsRugby) February 2, 2024
- Puntemakers:
Ierland: Drieë: Jamison Gibson-Park, Tadhg Beirne, Calvin Nash, Dan Sheehan en Ronan Kelleher. Doelskoppe: Jack Crowley (5). Strafskop: Crowley.
Frankryk: Drieë: Damian Penaud en Paul Gabrillagues. Doelskoppe: Thomas Ramos (2). Strafskop: Ramos.
- Vandag se ander bepalings:
16:15: Italië teen Engeland
18:45: Wallis teen Skotland