ʼn Uitstekende vertoning in die eerste helfte was toe pure verniet nadat die Bulls uiteindelik met 29 – 28 teen Lyon op die Stade de Gerland vasgeval het.
Die Pretorianers het energieke spel in aanloop tot die kragmeting opgedis en Zak Burger het voor rustyd saam met Sergeal Petersen die tuisspan se verdedigers geflous.
Ná 40 minute se spel het die Bulls ʼn voorsprong van 18 – 12 geniet en die span se ondersteuners het beslis geglo dat hulle dié een kon wen.
Daarna was dit ʼn wipplankstryd in die tweede helfte en daar was natuurlik ook ʼn tikkie drama in die doodsnikke van die kragmeting toe die Bulls geglo het dat Lyon die bal uit die speler wat as skrumskakel opgetree het, se hande geklap het.
Die wedstrydbeamptes het egter anders beslis en Lyon se veggees het uiteindelik die besoekers se doppie geklink.
Dream start for @VodacomBulls ????
Watch them take on @LeLOURugby live on @beinsports_FR, @tntsports, @SuperSportTV, @FloRugby ????#InvestecChampionsCup pic.twitter.com/ba0C4jOhgz
— Investec Champions Cup (@ChampionsCup) December 16, 2023
ʼn Paar minute vantevore kon ʼn strafskop ook die wa deur die wedstryddrif vir die Bulls getrek het, maar Jaco van der Walt was onsuksesvol met sy stelskoppoging.
Ja, ʼn mens kan seker oor Mike Adamson se blaservertoning ook kla – ʼn paar Bulls-spelers is immers met onwettige duikslae platgetrek – maar die besoekers het ook ʼn paar foute gemaak.
Daardie kortlynstaanbeweging wat na Yanis Charcosset se drie gelei het, gaan seker nog vir ʼn rukkie by die span spook.
Dit was uiteindelik so naby, maar tog ook so ver vir die Bulls.
Throw the lineout, then score the try ????
An ???????????????????????????????????????? 24 minute performance from @LeLOURugby replacement hooker, Yanis Charcosset ????
Instant highlights available now ⬇️
— Investec Champions Cup (@ChampionsCup) December 16, 2023
- Puntemakers:
Lyon: Drieë: Ethan Dumortier, Pierre-Samuel Pacheco, Alfred Parisien, Yanis Charcosset en Thibaut Regard. Doelskoppe: Martin Page-Relo en Paddy Jackson.
Bulls: Drieë: Zak Burger, Sergeal Petersen en Marco van Staden. Doelskoppe: Chris Smith (2). Strafskoppe: Smith (3).
- Groep 1-punteleer:
- Bordeaux: 10 punte
- Lyon: 8 punte
- Saracens: 5 punte
- Bristol Bears: 5 punte
- Bulls: 4 punte
- Connacht: 1 punt.