Laat ons nie doekies omdraai nie: Die Sharks is tans besig om met spartelvertonings in die Verenigde Rugbykampioenskap (VRK) vorendag te kom.
Dit is nie soseer die vier agtereenvolgende nederlae wat vir die wrangste smaak in die mond sorg nie – dit is veel eerder die wyse waarop hulle verloor wat ondersteuners na die boegoebrandewyn laat gryp.
ʼn Mens het verwag dat hulle teen Munster en Leinster gaan sukkel, maar om die onderspit teen die sukkelende Ospreys en die gewoontehoutlepelswaaiers Zebre te delf?
Haai, nee man.
Die afgelope naweek op die Stadio Sergio Lanfranchi was dit skeidsregter Peter Martin se skril fluitjie wat die Sharks die seerste teen Zebre gemaak het. ʼn Spul strafskoppe en kaarte (geel én rooi) het tot die besoekers se nagmerrievertoning bygedra.
Om dinge vinnig in perspektief te plaas: Zebre se uiteindelike oorwinning van 12 – 10 was die Italianers se eerste oorwinning in amper 30 probeerslae.
Nee man.
“Ons kon ten minste ʼn wedstryd of twee op die toer gewen het. Maar dit het nie gebeur nie,” het afrigter John Plumtree gesê.
Gelukkig is die Sharks nou weer terug in meer bekende waters: Twee tuiswedstryde op Kingspark (teen Connacht en die Dragons) en twee derby-wedstryde (teen die Bulls en Lions) sorg darem, soos wat Joshua na die Reën sou sê, vir ʼn tikkie lig op die horison.
“Ons is opgewonde om weer by die huis te wees. Ons gaan die hersetknoppie druk en baie hard werk om nie net momentum op te bou nie, maar ook om te verbeter.”
WE CAN'T WAIT TO HAVE YOU BACK ????#FearTheFin pic.twitter.com/2E3YUKfnbG
— The Sharks (@SharksRugby) November 14, 2023
Sharks se jongste uitslae:
Munster 34 – 21 Sharks
Leinster 34 – 13 Sharks
Ospreys 19 – 5 Sharks
Zebre 12 – 10 Sharks
Komende bepalings:
18 November: Sharks teen Connacht op Kingspark
25 November: Sharks teen Dragons op Kingspark
2 Desember: Sharks teen Bulls op Loftus Versfeld
Swak werwing is die oorsaak. Hoeveel Springbokke het julle die afgelope paar jaar gekoop en hoeveel speeltyd het julle uit hulle ontvang? Ek glo nie die somme klop nie.